[caption id="attachment_49895" align="aligncenter" width="560"] Foto: kazmkpu.kz[/caption]
Almatydaǵy Qazaq memlekettik qyzdar pedagogıkalyq ýnıversıteti QS StarsUniversityRatings halyqaralyq reıtıngisi boıynsha «3 juldyz» ıelengen tuńǵysh pedagogıkalyq joǵarǵy oqý ornyna aınaldy.
Buǵan deıin Qazaq memlekettik qyzdar pedagogıkalyq ýnıversıteti táýelsiz reıtıng agenttiginiń qorytyndysy boıynsha úzdik pedagogıkalyq ýnıversıtet atanǵan. Mamandar daıyndaý baǵyttary jáne deńgeıleri boıynsha respýblıkamyzdyń barlyq joǵary oqý oryndary arasyndaǵy 7 orynda turǵan ýnıversıtet.
«Qyzdar ýnıversıteti» medıa ortalyǵynyń habarlaýynsha, QS Stars – ýnıversıtet qyzmetine segiz ólshemi boıynsha kópaspektili baǵa beretin QS Quacquarelli Symonds qurastyrǵan reıtıngtik júıe. Bilim berýdi uıymdastyrýdyń 50 ındıkatory boıynsha júrgizilgen aýdıttik keshendi tekserýdiń qorytyndysy boıynsha ýnıversıtetke reıtıngtiń 0-den 5+-ke deıingi QS «juldyzy» beriledi. Ýnıversıtet jumysy táýelsiz derekkózderi arqyly keshendi saraptama negizinde baǵalanady. Onyń ishinde akademııalyq jáne kásibı orta ókilderiniń (onyń ishinde – jumys berýshilerdiń) saýalnamasynyń qorytyndysyn, bilim berý mekemesine degen stýdentter men túlekterdiń kózqarasyn da eskere otyryp jalpy baldan qorytyndy reıtıng baǵasyn anyqtaıdy.
QS Stars talabynda kórsetilgendeı QS Intelligence toby óte qatal ári táýelsiz saraptama kórsetkishteri men tıimdilik qorytyndysyn shyǵara otyryp, reıtıng ádisnamasy boıynsha Qazaq memlekettik qyzdar pedagogıkalyq ýnıversıtetine «3 juldyzdy» berýge uıǵarym shyǵarǵan.
QS e Stars ™ reıtıng júıesin 2004 jyldan bastap QS World University Rankings® táýelsiz quraýshysy QS Intelligence Unit arqyly elektrondy júıe boıynsha basqarylady. QS e Stars reıtıngisi ýnıversıtetterdi halyqaralyq standarttar boıynsha aldyn ala belgilengen mańyzdy kórsetkishter arqyly baǵalaıdy. Osy arqyly bilim berý mekemelerin úzdik kórsetkishterge talpyndyra otyryp, olardyń deńgeılerin arttyrýǵa septigin tıgizedi.
Qazaqstannyń joǵarǵy oqý oryndary arasynan bul «3 juldyzdy»osyǵan deıin ál-Farabı atyndaǵy Qazaq ulttyq ýnıversıteti alǵan. Al Qazaq memlekettik qyzdar pedagogıkalyq ýnıversıteti «3 juldyzdy» alǵan tuńǵysh qazaqstandyq pedagogıkalyq ýnıversıtet.
Aınash ESALI