Astana kúni ashyldy, mereke-shýaq shashyldy

Keshe Memleket basshysy Nursultan Nazarbaev Memlekettik týdy kóterýdiń saltanatty rásimine qatysty. Bul astanalyqtar úshin aıryqsha kún. Sebebi, dál osy 4 shildede Kók týymyzdy kókke kótere otyryp, qala kúniniń shymyldyǵy túriledi Jyldaǵy dástúr boıynsha bıyl da Astanadaǵy «Atameken» etnomemorıaldy kesheniniń alańynda asqaq kóńil-kúı ornady. Aınala kók týlarmen bezendirilip, án shyrqaldy.  Ánuran oryndalyp, elimizdiń eń úlken, bas baıraǵy bıikte jelbiredi. Elbasy yntymaǵy uıysqan hal­qymyzdy mereıli merekemen quttyqtady. Prezıdent Memlekettik tý kóterý rásimi dástúr boıynsha Astana kúnine arnalǵan is-sharalardyń bas­taýy bolyp sanalatynyna nazar aýdardy. Memlekettik tý árbir qazaqstandyq úshin qasıetti qun­dylyq bolyp sanalatyn ulttyq birlik nyshany ekenin atap ótti. «Bul – elimizdiń asqaq rámizi. Bıyl el táýelsizdiginiń 25 jyldyǵy. Biz ege­men Qazaqstandy osy kók tý astyn­da birge qurdyq. Shırek ǵasyr ishinde qýatty mem­lekettiń irgesi berik ǵı­maratyn birle­sip saldyq. Jaqyn­da ǵana respýb­lıka­myz BUU Qaýip­sizdik Keńesiniń turaq­ty emes múshe­si bolyp saılandy. Álemdik qoǵam­dastyq planetadaǵy beıbit­shilik pen qaýip­sizdikti qamtamasyz etý isine atsalysý syndy bıik mıssııa­ny Qa­zaqstanǵa senip tapsyrdy. Bul – eli­mizdiń bıik bedeli men tabys­ty damýy­nyń moıyndalýy. BUU Qaýipsizdik Keńesin­degi jumys bizdiń týymyzdy buryn­ǵydan da tanymal ete túsedi. Bıyl biz Astananyń 18 jyldyǵyn – ká­melettik jasqa tolýyn atap ótemiz. Bul – bıikter baǵyndyrylǵan jáne sol bıikten jańa perspektıvalar kórinip turǵan kez. Táýelsizdik týdyrǵan As­tana qulpyrǵan ústine qulpyryp, qa­rysh­tap ósýde. Qala eldi biriktirip, jańa tabystarǵa jetelep, kósh basynda kele­di», dedi Memleket basshysy. Nursultan Nazarbaev barsha Qa­zaqstan halqyna beıbitshilik pen tatýlyq, tynyshtyq pen baq-bereke tiledi. Rásim aıasynda Memleket basshysy – Qazaqstan Respýblıkasy Qarýly Kúsh­teriniń Joǵarǵy Bas qolbasshysy elimiz­diń joǵary áskerı oqý oryndarynyń túlekterine ofıserlik shen tapsyrdy. Prezıdenttiń qolynan 12 túlek – Qor­ǵanys mınıstrligi Qurlyq áskerleri áskerı ınstıtýtynyń, Ishki ister mınıstr­ligi Ishki áskerler áskerı ınstıtýtynyń jáne Ulttyq qaýipsizdik ko­mıteti áskerı ınstıtýtynyń úzdik biti­rýshileri shen aldy. Elbasy respýblıkanyń joǵary áskerı oqý oryndarynyń barlyq túlek­terin quttyqtap, qazaqstandyq patrıo­tızm túrli salada, sonyń ishinde eń aldy­men Otanǵa qyzmet etýde kórinis taba­tynyn aıtty. «Búgin biz joǵary áskerı oqý oryn­darynyń úzdik túlekterine ofıserlik shender tapsyramyz. Osy kúnderi myń­daǵan qazaqstandyq jas­tar oqýlaryn aıaqtap, úlken ómirge aıaq basady. Sizder óz joldaryńyzdy eldiń bas baıraǵynyń al­dynda, saltanatty jaǵdaıda bastap otyr­syzdar. Bul – kezdeısoqtyq emes. О́ıtkeni, sizder qoǵamda qurmetke ıe aıryq­sha mamandyqty tańdadyńyzdar. Sizder birneshe jyldy jaqsy bilim alýǵa, jańa mashyqtardy ıgerýge, dos­tyq pen ózara kómektiń qundylyǵyn túsi­nýge arnadyńyzdar. Endi osynyń bárin tájirıbede qoldaný kerek»,  dedi Nursultan Nazarbaev. Elimizdiń júregi, táýel­sizdigimizdiń tiregi – Astana kúni osylaısha keshegi kúnnen bastap resmı ashyq dep jarııalandy.  Al bul kúnniń keremetin keshegi kúnniń taǵy bir aıryqsha jańalyǵy aıshyqtaı tústi. Ol – osy aıtýly kúni  Astana qalasynyń mıllıonshy turǵynynyń dúnıe esigin ashqany. Dál keshegi kúni elor­danyń mıllıonynshy turǵynynyń ómirge kelgenin Elbasy da  erekshe atap ótti. «Búgin erteńgisin Muhame­dıarlar otbasynda Astananyń mıllıonynshy turǵyny ómirge kelgenin zor qýanyshpen habarlaımyn. Sábıdiń anasy – balabaqsha tárbıeshisi, ákesi – elektr monteri. Endi bizdiń elorda mıllıon turǵyny bar qalalar qataryna endi», dedi Elbasy. Kemel keleshekke jol ash­qan qasterli boıtumarymyz – Asta­nanyń aıryqsha kúni qutty bolsyn! Dınara BITIKOVA, «Egemen Qazaqstan»