Astananyń mıllıonynshy azamaty

Keshe Elbasy Nursultan Nazarbaev elorda toıynyń bastalǵanyn pash etetin Memlekettik týdy kóterý rásiminde sóılegen sózinde Astananyń mıllıonynshy turǵyny dúnıege kelgenin úlken qýanysh ústinde aıtty. Altaı men Atyraý arasyndaǵy Alash balasynyń basyndaǵy bórkin aspanǵa attyrǵan bul jaǵymdy jańalyq sol sátinde-aq jahanǵa jaıyldy. Qasıetti Saryarqa saýyrynda qazyǵy qaǵylyp, keregesi kerilgen Qazaqstannyń bas qalasy, mine, endi megapolıs mekenge aınaldy. Bala jastan basymyzǵa jas­tap oqyǵan batyrlar jyrynyń bas­ty keıipkerlerindeı saǵat sanap ósken samala shahar elimizdiń júregi, Táýelsizdigimizdiń tiregi bolyp qana qoımaı, tórinde tórtkúl dúnıeniń saıa­sat serkeleri mándi májilis quratyn mártebege de ıe ekendigi bárimizge belgili.  Alla jarylqap, aldynan aq kún týa bersin, Aqordaly Astananyń! Al endi Astanany mıllıoner atandyrǵan nesibeli náreste kim? Aıtaıyq. Qaladaǵy №1 perınataldy ortalyqta týǵan qyzdyń aty – Saıda. Ol – ata-anasynyń kózin ashyp kórgen tuńǵyshy. Demek, jarasym tapqan jas jubaılardyń qýanyshynda shek joq ekendigi aıtpasa da túsinikti. Ińgálaǵan sábıine ilesip elorda tarıhyna enip ketkeli tursa, qaǵanaqtary qaryq, saǵanaqtary saryq bolmaı qaıtedi endi. Kúlsheli kishkentaıdyń ákesi Oljas Muhamedıardyń mamandyǵy energetık, «Astana-REK» kásipornynda eńbek etedi. Al sheshesi Araılym №9 «Nurshashý» balabaqshasynda tárbıeshi. Ekeýi osy Astanada tanysyp, tabysyp otaý kóteripti. Erli-zaıyptylar ázirshe jigittiń áke-sheshesiniń qolynda turyp jatyr. Bólek shyǵý oılarynda joq bolatyn. Biraq, myna ońdy oqıǵa josparlaryn ózgertip jiberdi. О́ıtkeni, ómir esigin erekshe mártebemen ashqan Saıdanyń baǵy artyp, Astana qalasynyń ákimi Áset Isekeshev perzenthanada mereıli otbasyna eki bólmeli páterdiń kiltin berdi. Sóıtip, kósheli basshyǵa laıyq márt minez tanytty. Qol-aıaǵyn baýyryna áli ala qoımaǵan Araılymdy mazalamaı-aq, tóbesi kókke eki-aq eli jetpeı turǵan Oljasty áńgimege tartqan edik. – Jarymdy tolǵaq qysyp, perzenthanaǵa aparǵanda, eń aldymen, aman-esen bosanýyn tiledim. Bóten oı bolmady. Bir-aq kúnde esimimizdiń elimizge áıgili bolatynyn qaıdan bileıin. Qarapaıym qazaqstandyqtardyń beıbit aspan astynda besik terbetip, berekeli tirshilik keshýine barlyq jaǵdaıdy jasaǵan parasatty Prezıdentimizge myń da bir rahmet. Qamqorlyq kórsetken qala basshylyǵyna rızamyz. Baqyttan basym aınalyp turǵandyqtan aýzyma basqa sóz túspeı tur, – dedi ol júrekjardy alǵysyn jasyra almaı. О́z kezegimizde biz de el gazeti – «Egemenniń» atynan aıdarynan jel esken azamatqa «Balapanyńyzdyń baýy berik bolsyn!» degen tilegimizdi bildirdik. Talǵat BATYRHAN, «Egemen Qazaqstan»

Mıllıonynshy!..

Kókiregimdi jaryp shyqty jyr gúli, Súıinshi, dostar, Baıǵazy dep bil muny! Týdy búgin, Dúnıege «shyr» etip, Astananyń mıllıonynshy turǵyny!   Kún de búgin tym erekshe jarqyrar, Shabyt qusy qııa shyńǵa sharq urar. Shırek ǵasyr – Astanamnyń Táýelsiz – Maqtanamyn – Bir mıllıon halqy bar.   Týymyz – kók, Aspan da – kók, Tas ta – kók. Baýyr da – kóp, Týys ta – kóp, Dos ta – kóp. Bas qalada Tý ustaıtyn qolyna, Týdy, mine – Mıllıonynshy jas bóbek.   Osy eken ǵoı, Tirshiliktiń jalǵasy, Mereıtoıda – Merekeniń dál basy. Bul da bir kún – Astanany basqarar, Kim biledi, Bolar bir kún Elbasy! Ne jetedi dál osy bir mezetke, Kúmbirledi – Kúı qonaqtap ózekte. Týa sala – Astananyń turǵyny, Turmaıdy ol Páter kútip kezekte.   Júrer, bálkim, О́leńdetip, jyrlatyp, Ǵaryshkerdeı juldyzdarmen til qatyp... Mıllıonmen esepteler zamanda Mıllıonynshy turǵyn bolý – Bir baqyt.   Bıik bolsyn, Ol árdaıym asqan shyń, Dos súıinip, Jaýy bolsa – jasqansyn. Qazaqtaǵy – Mıllıonerler tizimi, Astanadan – Bas qaladan bastalsyn! Serik TURǴYNBEKULY, halyqaralyq «Alash» ádebı syılyǵynyń laýreaty, Qazaqstannyń eńbek sińirgen qaıratkeri  ASTANA