Bıyl ál-Farabı atyndaǵy Qazaq ulttyq ýnıversıteti jýrnalıstıka fakýlteti ǵylymı keńesiniń sheshimimen «25 maýsym – jýrfakta dıplom tapsyrý jáne shákirttik ýáde qabyldaý kúni» dep belgilendi. Endi jyl saıyn dál osy kúni jýrnalıstıka fakýltetiniń túlekteri joǵary bilim alǵanyn rastaıtyn dıplom alyp turyp, jumys berýshiler men ustazdar aldynda shákirttik ýáde beretin bolady.
Ýáde mátini mynadaı: «Men – ál-Farabı atyndaǵy Qazaq ulttyq ýnıversıteti jýrnalıstıka fakýltetiniń túlegi – joǵary bilimdi maman ekendigimdi rastaıtyn dıplomdy ala otyryp, Otanyma, Ata Zańyma, kásibı qyzmet ádebine jáne ózimniń súıikti ýnıversıtetime adal ekendigimdi eren eńbegimmen dáleldeýge ýáde beremin!».
Shákirttik ýáde mátini úsh tilde daıyndalyp, aldyn ala jumys berýshiler men ustazdar talqysyna salynǵan bolatyn. Mundaı sheshim jýrnalıstıka mamandyǵyn alyp jatqan shákirtterdiń óz kásibiniń ádebi, Ata zańy, Otany aldyndaǵy jaýapkershiligin arttyrý úshin dál qazirgi aqparattyq maıdan asqynyp turǵan zamanda asa qajet bolǵandyqtan qabyldanǵan.
Úlken saltanatpen ótken dıplom tapsyrý rásimine Prezıdent Ákimshiligi baspasóz qyzmeti Almaty bıýrosynyń jetekshisi Valerıı Jandáýletov, Májilis depýtaty Artýr Platonov, «Mysl» jýrnalynyń bas redaktory Seıdahmet Quttyqadam, «Aqıqat» jýrnalynyń bas redaktory Amanhan Álim, «Qazaq gazetteri» JShS prezıdenti Jumabek Kenjalın sekildi buqaralyq aqparat quraldarynyń basshylarymen birge Saǵymbaı Qozybaev, Káken Qamzın bastaǵan ustazdar qaýymy qatysty.
Júzdegen ata-ana fakýltet ómirinde tuńǵysh ret júzege asqan bul bastamany qýana quptady.
Aınash ESALI,
«Egemen Qazaqstan»
ALMATY