Astana kúnine oraı elordadaǵy Abaı eskertkishiniń aldynda ashyq aspan aıasynda erekshe merekelik shara ótti. «Uly Dala, ult muraty, urpaq bolashaǵy, Máńgilik El – Táýelsiz Qazaqstan!» taqyrybymen ótken kitap jáne poezııa festıvalin qala ákimdigi men «Nur Otan» partııasy jáne Ortalyqtandyrylǵan kitaphanalar júıesi uıymdastyrǵan bolatyn. Bul shara babadan qalǵan baıtaq dalamyzda baǵzy zaman men bolashaqtyń arasyndaǵy názik baılanysty úzip almaýǵa jáne keshe men keleshektiń araqatynasyndaǵy rýhanı qundylyqtardy qaıta jańǵyrtýǵa negizdeldi. Urpaqtar sabaqtastyǵyn ulyqtaı otyryp, rýhanııatty dáripteýge arnalǵan alqaly jıyn ultymyzdyń uly kemeńgeri Abaı Qunanbaıulynyń rýhyna taǵzym etip, eskertkishine gúl shoqtaryn qoıýmen bastaldy. Izgilikke úndeıtin ıgi istiń basty uıymdastyrýshylary basqosýǵa Memlekettik syılyqtyń laýreaty, qazaqtyń aı mańdaıly aqyn qyzdarynyń biri – aqyn Marfýǵa Aıthojınany Almatydan arnaıy shaqyrypty. Qala qonaqtary men qalyń buqaraǵa arnalǵan festıvaldiń jalpy nobaıy kesek-kesek bes bólimnen quralǵan. Sonyń alǵashqysy retinde sahna shymyldyǵy poezııa padıshasy Farıza Ońǵarsynovanyń «О́leńder jınaǵy» kitabynyń resmı tusaýkeserimen ashyldy. Kózi tirisinde qalamdas qurbysy ǵana bolyp qoımaı, jan saraıyn jan-tánimen túsinisken dosy Farıza jaıly esteliktermen bólisken Marfýǵa apaı qaısar qazaq qyzynyń taǵy bir óleńder jınaǵynyń jaryq kórýimen oqyrman qaýymdy quttyqtady. Festıval baǵdarlamasynyń kelesi kezeńi «Abaıdyń rýhy» men «Alty Alashtyń arysy – Álıhan Bókeıhan» degen ataýlarmen jalǵasyn tapty. Munda Q.Qýanyshbaev atyndaǵy akademııalyq qazaq mýzykalyq drama teatry ártisteriniń sahnalaýymen Abaı Qunanbaıuly men Álıhan Bókeıhannyń ómiri men shyǵarmashylyǵynan teatrlandyrylǵan kórinister qoıyldy. Astana kúnine oraı arnaıy uıymdastyrylǵan merekelik sharanyń kelesi bólimi «Jyrlaıdy júrek» degen ataýmen M.Maqataevtyń 85 jyldyǵyna arnalǵan ádebı-mýzykalyq kompozısııamen órbidi. Jas aqyndar Muqaǵalı óleńderin oqyp, ánderin naqyshyna keltire oryndady. Al «Ádebıet áleminiń maqtanyshtary» aıdarymen ótken ádebı-aqyndyq vernısajda shyǵarmalary arqyly gúldengen Qazaqstandy, onyń jetistikteri men tarıhyn jyrlaǵan qalam ıelerimen kórermenderdiń erkin syr-suhbatyna ulasty. Osylaısha, shaǵyn formatta aqyn-jazýshylardyń oqyrmandarmen ótken kezdesýine belsendi qatysýshylar arnaıy estelik, syılyqtarmen marapattaldy. Sonymen qatar, shara aıasynda «Nur Otan» partııasy Astana qalalyq fılıaly men Ortalyqtandyrylǵan kitaphanalar júıesi birlese uıymdastyrǵan «Eldiktiń tereń tamyry» atty «Álıhan Bókeıhan oqýlarynyń» jeńimpazdary da anyqtalyp, jeńimpazdarǵa syı-qurmetter kórsetildi. Al Abaı eskertkishiniń aldyndaǵy alańqaıda uıymdastyrylǵan kitap baspalarynyń jármeńke-kórmesi merekeniń ajaryn asha túskendeı. О́ıtkeni, «Uly Dala, ult muraty, urpaq bolashaǵy, Máńgilik El – Táýelsiz Qazaqstan!» ataýymen kórkem bezendirilgen keń kólemdi kitap kórmesi tórt bólimge negizdelgen bolsa, onyń ereksheligi sol «Shırek ǵasyrlyq belester», «Eńseli elorda, asqaqtaǵan Astana», «Uly maqsattar mekeni» jáne «Qalamy qanatty tulǵalar» aıdarymen aıshyqtalǵan kórmedegi kitaptardyń oqyrman qaýymǵa úlestirilýi edi. Nurlybek DOSYBAI, «Egemen Qazaqstan»