Oǵan oqýǵa túsý úshin úmitkerler qandaı talaptarǵa saı bolýy tıis?
Qazaqstan Respýblıkasy Qorǵanys mınıstrliginiń Kadet korpýsyna irikteý jalǵasýda. Bıylǵy jyly oqý orny 280 kadetti oqýǵa qabyldaýǵa daıyn. Jyl saıyn oqýǵa 1 500 jas qazaqstandyq qujattaryn tapsyratynyn eskere otyryp, nıet bildirýshilerge birqatar talaptarǵa saı bolý úshin mańyzdy baıqaýdan ótýge týra keledi.
Birinshiden, úmitkerlerdiń jasy. Budan buryn áskerı boryshyn ótkermegen bozbalalar Kadet korpýsyna 17-21 jas aralyǵynda oqýǵa túse alady. Áskerı qyzmet ótkergen nemese qazirgi ýaqytta merzimdi áskerı qyzmettegi azamattardyń oqýǵa túsý jasy 24 jasqa deıin, al qazirgi kezde QR QK-de kelisimshart boıynsha qyzmet atqaryp júrgenderdiń jasy 25-ke deıin shekteldi.
Odan basqa, bolashaq kadetterdiń densaýlyǵy myqty jáne úlgerimi 3,5-ten tómen emes ortasha baly bar bilimi týraly qujaty bolýy tıis. Bul rette UBT sertıfıkaty men keshendi testileýdiń nátıjesi qajet emes.
Naǵyz kadet bolmas buryn bozbalalarǵa irikteýdiń birneshe kezeńderinen ótý qajet. Eń aldymen aldyn ala medısınalyq kýálandyrý. Ony talapkerler ótinish bergen jeri boıynsha ótedi. Ári qaraı aldyn ala kásiptik-psıhologııalyq irikteý, dene daıarlyǵyn tekserý, sońǵy medısınalyq kýálandyrý jáne kásiptik-psıhologııalyq irikteý. Al eń sońynda konkýrstyq irikteý jáne oqýǵa qabyldaý. Barlyq osy kezeńderdi bozbalalar 20 shildeden bastap tamyzdyń birinshi jartysyna deıin Kadet korpýsynda ótedi. Bul rette qoldanystaǵy áskerı qyzmetshiler, azamattyq balalar men áskerı mektep túlekteriniń kezeńderdi ótý merzimi erekshelenedi.
Qorǵanys mınıstrliginiń Sh. Ýálıhanov atyndaǵy Kadet korpýsy – búgingi tańda kishi komandalyq quramdaǵy áskerı kadrlardy daıarlaýdy júzege asyratyn Qazaqstandaǵy birden-bir oqý orny. Oqý orny motoatqysh, tankti, áýe-desanttyq áskerler mamandyqtary boıynsha kadrlardy daıarlaıdy. Jalpy oqytý merzimi 1 jyl 10 aı. Osy ýaqyt ishinde kadetter áskerı ǵylymdy teorııa júzinde jáne QR QK áskerı bólimderinde is júzinde meńgeredi. Oqý aıaqtalysymen barlyq kadetter Qarýly Kúshterdiń áskerı bólimderine bólinedi. Árqaısysymen 10 jyldyq merzimge kelisimshart jasalady.
Bıylǵy jyly Kadet korpýsy 185 kadetti túletip ushyrdy. Bilim oshaǵy qurylǵan sátten bastap 20 jyl ishinde oqý orny áskerlerde qyzmet atqaryp júrgen 2 500-den asa serjantty daıarlap shyǵardy.
Dastan KENJALIN,
«Egemen Qazaqstan»