Qaldaıaq usta – án áleminiń suńqary Shámshiniń ákesi. Shámshi qazaqtyń kóginde án bolyp nur jaýdyryp turǵan kezdiń ózinde búgingi Shámshi aýylynyń adamdary úshin Qaldaıaq usta balasynan bedeldirek eken.
Temirden túıin túıetin ustanyń qolynda kórikshi bolyp búginde Memlekettik syılyqtyń laýreaty, akademık, ol kezde mektep oqýshysy Ábdirazman Ombaev ta jumys jasaǵan.
– Qaldaıaq ata kóp sózge joq bolǵanymen boıynda úlken qasıeti bar, aýzynan Allasy túspeıtin, namazyn qaza qylmaıtyn taqýa adam edi, – deıdi akademık. –Balalarǵa til-kóz tıgende ataǵa ákeletin. Jańa ǵana ólip-talyp anaý dúnıe men myna ómirdiń arasynda arpalysyp jatqan bala usta duǵa oqyp, úshkirgennen keıin birazdan soń quldyrańdap júgirip keter edi.
Otyrar aýdanyndaǵy keshegi «Temir» keńshary, búgingi Shámshi aýylynda ótken ǵasyrdyń jetpisinshi jyldary Qaldaıaq usta óz qolymen kirpishin órgen qarashańyraq úı bar. Qazirgi ýaqyt úshin toqal tam sııaqty kóringenimen, sol ýaqyttaǵy úsh-tórt bólmeli úıdi Qaldaıaq usta ózi salǵan. Shámshiniń kindik qany Sarykól degen jerde tamǵan. Ol jerge Otyrar aýdanynyń burynǵy ákimi Salyhan Polatov eskertkish belgi ornatqan edi. Aýdandyq bıýdjet esebinen Shámshi aýylyndaǵy qarashańyraq janynan eńseli úı kóterilip jatyr.
Irgede ataqty kompozıtordyń áni arqyly muqym Qazaqstanǵa ataǵy shyqqan Arys ózeni baıyrqalap aǵady.
Qaldaıaq usta soqqan áýlettiń qara shańyraǵynda búginde uly Baqyt turyp jatyr. Ustanyń kóp dúnıelerin biz «Otyrar» tarıhı ólketaný mýzeıinen kórdik. Qaldaıaq usta dúnıeden ótkende temir tósi eki-úsh kún shyńyldap turdy deıdi aýyl adamdary. Sol ańyz qylǵan tas tós pen balǵa da mýzeıde.
Shámshi – ataqty ánderimen qazaqtyń rýhyn kótergen kompozıtor. Tyń ıgerý kezinde qazaqtar óz jerinde otyz paıyzǵa deıin azaıyp ketti. Sonda Shámshi ánderi qazaqtyń memleketshildigine qyzmet etti. Ulttyq rýhyn kúsheıtti.
Bálkim, sol ánderdiń birazy ákesi Qaldaıaq salǵan osy qara-shańyraqta dúnıege kelgen shyǵar...
Baqtııar TAIJAN,
«Egemen Qazaqstan»
Ońtústik Qazaqstan oblysy