Búgin Tel-Avıv qalasynda fýtboldan Eýropa lıgasynyń ekinshi irikteý kezeńinde Izraıldiń «Makkabıi» men Almatynyń «Qaırat» komandalary kezdesti. Oıyn 2:1 esebimen alań ıeleriniń jeńisimen aıaqtaldy.
Izraıldikter matchtyń 5-mınýtynda esep ashty. Dopty bizdiń Stanıslav Lýnevti erkin aldap ótken Tal Ben-Haım qaqpanyń alys buryshyn ádemi tastady. Birazdan keıin bizdiń jigitter óz-ózderine kelip, qaýipti shabýyldar uıymdastyrýǵa kóshti. Taım ortasyna qaraı alańdaǵy jaǵdaı teńesti. Osy tusta qaırattyqtar sapynda Andreı Arshavınniń belsendigi aıqyn baıqaldy. Biraq komanda budan artyqqa bara almady.
Almatylyqtar ekinshi taımdy edáýir qarqyndy bastady. Olar aqyry 64-mınýtta buryshtamadan berilgen dop kezinde tarazy basyn teńestirdi. Dopty buryshtan Isael áýeletip jetkizdi de, Jerar Goý ony baspen qatty uryp, qaqpanyń torynan bir-aq shyǵardy.
https://youtu.be/SCUXepn1eJs
Qaırattyqtardyń budan keıin de gol soǵatyn múmkindikteri kóp boldy. Bir Andreı Arshavınnniń ózi qaqpaǵa birneshe ret týra soqqy jasady. Alaıda, olardyń biri nysanadan sál qısyq ketse, endi birin qaqpashy ustap alyp jatty. Munyń esesine, alań ıeleriniń joldary bolyp ketti. Olar 85-mınýtta kezekti shabýyl óristetti. Sonyń ótinde júrgen komanda kapıtany Gal Alberman dopty bizdiń qaqpashynyń sol jaq buryshynan torǵa qaraı súńgite saldy.
https://youtu.be/XqrbyT9v6iY
Bir aıta ketetin jaıt, alań ıeleri sımýlıasııamen qonaqtardyń kóp mazasyn qashyrdy. Kóp jaǵdaıda alańdaǵy portýgalııalyq tóreshi solardyń osy qıturqy áreketine túsip qalyp jatty. Osynyń jeleýimen bizdiń birneshe fýtbolshy eskertý qaǵazyn alyp ta úlgerdi. Al ızraıldikter golkıperiniń Arshavın jaqyndaǵannan ótirik qulap, buratylyp jatyp alǵany tipti soraqy boldy. Osyna ańǵarǵan arbıtr tek matchtyń sońyna qaraı ǵana jorta qulaı salatyn ızraıldikterdi jazalaı bastady. Biraq munyń biz úshin eshqandaı jeńildigi bolǵan joq. Osyndaı lastaý oıynmen kózge túsken alań ıeleri jeńisti alyp ketti.
Taǵy bir aıtatyn nárse, alańdaǵy eki komandanyń da bas jattyqtyrýshysy grýzın mamandary boldy. Atap aıtqanda, alań ıelerin saıysqa Shota Arveladze daıyndasa, meımandardy Kahaber Shadadze bastap bardy. Kezinde bulardyń ekeýi de Tbılısıdiń «Dınamo» komandasynyń sapynda oınaǵan.
Endi «Makkabı» úshinshi irikteý kezeńinde Rýmynııanyń «Pandýrıı» klýbymen kezdesedi. Komandalardyń birinshi oıyny 28 shilde kúni, ekinshi kezdesýi 4 tamyzda ótedi.
Dastan KENJALIN