[caption id="attachment_52466" align="aligncenter" width="560"] Foto: kommersant.ru[/caption]
Brazılııada lańkestik shabýyl jasaýǵa nıettengen 10 adam qamaýǵa alyndy. Málimetterge qaraǵanda, polısııa qyzmetkerleri olardy DAISh ekstremıstik uıymymen baılanysy bar dep kúdiktengen eken. Al rbc.ru aqparyna sáıkes, ádilet mınıstri Aleshandrı Moraesanyń aıtýynsha, tutqynǵa túskender qandy áreketterin Rıo-de-Janeıroda ótetin Olımpıada kezinde júzege asyrmaq bolǵan.
Associated Press arnaıy operasııa kezinde 12 adamnyń qolǵa túskenin habarlady. Osyǵan baılanysty memleket prezıdentiniń mindetin atqarýshy Mıshel Temer shuǵyl túrde mınıstrler kabınetiniń otyrysyn ótkizdi. Kúdiktilerdi ustaýǵa baılanysty operasııa jumystary toǵyz shtatta júrgizildi.
Terrorlyq shabýyldaryn iske asyrý úshin atyshýly ekstremıstik toptarmen baılanys ornatýǵa tyrysqan. Polısııa qyzmetkerleri olardy negizinen ońtústiktegi Parana shtatynda qolǵa túsirdi. Atalǵan shtattyń soty tutqynǵa alynǵandar qarý-jaraq asynyp, «partızan ádisin» qoldanbaq bolǵan degen málimdeme jasady.
Jaqynda Latyn Amerıkasynda ózderin «Ansar al-Halıfat Brazılııa» dep ataǵan alǵashqy radıkaldy uıymnyń shyqqany habarlanǵan bolatyn.
Brazılııanyń qorǵanys mınıstri Nıssadaǵy jaǵdaıdan keıin Olımpıada kezinde qaýipsizdikti qamtamasyz etý úshin qatań sharalar qabyldanatynyna ýáde bergen. Tártip saqshylary ásirese, ózin-ózi jaryp jiberetin jankeshtilerden qaýiptenedi. expert.ru málimetinde osyǵan baılanysty 85 myń ásker jumyldyrylatyny aıtylǵan. Bul 2012 jyly Londonda ótken Olımpıadadan eki ese kóp.
Aıan ÁBDÝÁLI