Almaty qalasynyń kóshesinde qylmysker salǵan lań jurttyń janyn túrshiktirýmen qatar, qalyń buqaranyń temir túımeli quqyq qorǵaý qyzmetkerlerine degen senimi men erekshe qurmetin jańǵyrtqandaı bolǵany ras. Buryn, syrt kózge tek polısııa formasynda ǵana kórinetin saqshylardyń da jeke ómiri, otbasy, alǵa qoıǵan maqsattary bar ekendigin tereńnen sezingendeı boldyq. Buıyǵy jatqan qoǵam úshin polısııa qyzmetkerlerine basqasha kózben qaraý tosynnan tıgen aýyr soqqy arqyly keldi desek te bolady. Árıne, ókinishti-aq, alaıda, qospasy joq aqıqat ekenin de moıyndaýymyz kerek...
Qanquıly qolynan qapyda qaza tapqan polısııa serjanty Aıan Ǵalıev nebary 2 jyldan keıin zeınetkerlik demalysqa shyǵady eken. Ishki ister organynda 1997 jyldan beri qyzmet etip kele jatqan Aıan jaıly qyzmettesteri, týǵan-týysy, tipti, kórshileri de onyń azamattyq adal júregi men kisige kómek berýge daıar turatyn qaǵylez minezi týraly aıtýda. Bálkim, batyrlyq degenimiz de qarapaıym adaldyqtyń astarynda jasyrynyp jatatyn adamı qasıettiń kilti shyǵar.
О́miriniń sońǵy 10 jylyn Almaty qalasyndaǵy Memlekettik kirister basqarmasynyń ǵımaratyn kúzetýge, mańyzdy memlekettik qyzmetkerlerdiń qaýipsizdigin qamtamasyz etýge arnaǵan Aıan Ǵalıev óziniń sońǵy jumys kúninde de qyzmettik mindetine adaldyqpen, jaýapkershiligindegi beıbit jandardyń ómirin saqtap qalý jolynda kóz jumdy. Eger, Aıan basyn báıgege tigip toqtatpasa, qarý asynǵan qanisher qansha adamnyń ómirin jalmar edi?! Basqarma qyzmetkerlerimen qosa, kúndelikti jumys barysynda aǵylyp kelip jatqan salyq tóleýshilerdiń de bas amandyǵy úshin keýdesin oqqa baılap, janyn qurban etý – ekiniń biri bara bermeıtin úlken erlik.
Aıannyń artynda ańyrap qart anasy qaldy, óń men tústiń arasynda eseńgirep jary qaldy, ómir boıy saǵynyshy basylmaı ótetin qos perzenti qaldy. Kózi tirisinde «Quqyq qorǵaý salasynyń úzdigi» atanyp, 3 birdeı medaldi keýdesine taqqan batyr uldyń ornyn endi eshkim de, esh nárse de toltyra almasy haq!
Aıannyń azamattyq kelbeti men ańqyldaq minezin, shańyraǵyna degen qamqorlyǵyn saǵynysh pen qaıǵynyń ashy jasyn juta otyryp sóz etken súıgen jary jýyrda ǵana bosanypty. Jasy 85-ke aıaq basqan qart anasy jylaı-jylaı kóz janary qurǵaǵan. Keıýana qyzyǵyn kórip, kóńilim jaz bola ma dep otyrǵanda qara shańyraqqa ıe bop júrgen ulynan tap osylaı kóz jazyp qalamyn dep oılady ǵoı deısiz be? Es toqtatyp qalǵan eresek qyzy ómir boıy ákesi jaırańdap kirip kelerdeı, bosaǵaǵa jáýteńdep qaraýmen ótpeı me?! Dúnıe esigin jańa ashqan sábı kúni erteń áke júreginiń jylýyn ańsamaı ma. Qansyrap jatqanda Aıannyń ózi de zaryǵyp kútken 7 aılyq ulyn: «Bir ıiskesem-aý», dep ańsamady deısiz be?!.
Qoǵamnyń qabyrǵasyn qaıystyryp ketken bozdaqtardyń qazasy, Aıannyń keýdesine qadalǵan qorǵasyn oq – turaqtylyq pen tynyshtyǵymyzǵa jasalǵan sońǵy shabýyl bolsynshy!..
Qanat ESKENDIR,
«Egemen Qazaqstan»