«Balasy atqa minse, anasy taqymyn qysady» deıtin ataly sóz bar. Belarýs jerinde ótken bıylǵy «Slavıan bazary – 2016» baıqaýynda baq synaǵan jerlesimiz jas ánshi, qazaq estradasynda «ADAM» degen atpen tanylǵan Dáýren Orazbekov úshin alańdap, úmit kútkender kóp boldy. О́tken jyly Dımash Qudaıbergenov atalǵan alamannyń aldynan kórinip, bas báıgeni qanjyǵasyna baılap qaıtqanyn baspasóz betteri jarysa jazǵany belgili. Degenmen, «jyl saıyn jyly qabaq tanyta bere me, osy joly oljasyz qalamyz ba?» degen kúdik te boldy. Biraq, «árekettiń bereketi bolady» demekshi Adamnyń eńbegi elenip, birinshi oryndy enshilep qaıtty. Álemniń 44 elinen kelip synǵa túsken ónerpazdardyń arasynan óziniń baǵy janyp, júldeli orynǵa ıe bolǵanyn jas ánshi úlken jetistigim dep baǵalap, ári qaraı tabandy eńbek etýge talpynatynyn jetkizdi.
«Osymen HXV márte ótkizilgen halyqaralyq baıqaýǵa qatysýdyń ózi jeńis dep oılaımyn. Maǵan qoldaý bildirip, qolushyn bergen Mádenıet jáne sport mınıstrligine, jankúıerlerime úlken alǵysymdy bildiremin. Men baıqaýdyń birinshi kúni Danıl Korotaevtyń sózine jazylǵan «Ispoved» ánin oryndap, 77 upaıǵa, al baıqaýdyń sońǵy kúninde «Sam Smith “I’m Not The Only» ánin oryndap, 78 upaıǵa ıe boldym. Osylaısha eki kún boıy jınaǵan 155 upaıym arqyly birinshi orynǵa qol jetkizdim», – deıdi jas ánshi.
Halyqaralyq baıqaýdyń qazylary qatarynda Valerıı Leontev, Natalıa Mogılevskaıa, Naǵıma Esqalıeva jáne Aleksandr Tıhonovıch bolǵan.
Tórt kúnge sozylǵan óner báıgesinde baǵy janyp, baby kelip, kórermenderdiń kóńilinen shyǵyp, qazylardyń joǵary upaıyn alǵan belarýsııalyq ánshi jeńimpaz atanǵanyn da aıta ketkenimiz oryndy.
Sóz basynda byltyrǵy «Slavıan bazary – 2015» baıqaýynyń jeńimpazy Dımash Qudaıbergenov bolǵanyn atap óttik. Al osy jyly festıvaldy uıymdastyrýshylar Dımashty konserttik baǵdarlamaǵa resmı túrde shaqyrǵan. Ol onda «Opıat metel» kompozısııasyn oryndaǵan.
Atalǵan án baıqaýynyń júlde qory da az emes eken. Jeńimpaz jerlesimiz qanjyǵasyna baılaǵan qarajatyna úılenip, toı jasaıtynyn da jasyrmady.
Raýan QAIDAR,
«Egemen Qazaqstan»