Bıylǵy «Coca-Cola Bylǵary Dop» balalar-jasóspirimder týrnıri qazaq fýtbolynyń otany sanalatyn Semeı qalasynda ótti.
Týrnırdiń baldyrǵan balalarǵa arnalǵan oıyndary Semeıdegi «Týrıst» jáne «Sementnık» sporttyq nysan alańdarynda, al fınaldyq jekpe-jek «Spartak» stadıonynda uıymdastyryldy.
Osy joly «Coca-Cola Bylǵary Dop» týrnıriniń bas júldesin Qaraǵandy jáne Atyraý oblystarynyń balǵyn fýtbolshylary fınaldyq kezdesýde ózara sarapqa saldy. Tartysty ótken oıynnyń negizgi ýaqyty 1:1 esebimen teń aıaqtaldy. Al kezdesýden keıingi jeńimpazdy anyqtaǵan penaltı serııasynyń nátıjesinde qaraǵandylyq jas fýtbolshylardyń baǵy jandy. Qorytyndy esep – 6:5.
Jarystyń marapattaý rásimine elimizdiń tanymal fýtbolshysy, óziniń sporttyq mansabyn Semeıdiń «Elim-aı» komandasynda bastaǵan, Eýropa chempıonatynyń irikteý oıyndary aıasynda Qazaqstan quramasynyń alǵashqy golyn soqqan Andreı Karpovıch qatysty.
Jalpy bul týrnırge jyl saıyn elimizdegi 6200 mekteptiń 400 myńnan astam oqýshysy qatysady. О́ziniń on jyldyq tarıhynda «Coca-Cola Bylǵary Dop» jarysynda jasyl alań ústinde bir mıllıonnan asa bala dop teýipti.
Qaırat ÁBILDINOV,
«Egemen Qazaqstan»
QARAǴANDY