Qazaqstan Bilim jáne ǵylym mınıstrligi elimizdegi qazaq-túrik lıseıleriniń (QTL) is-áreketine qatysty óziniń resmı pozısııasyn bildirdi.
Mınıstrliktiń baspasóz qyzmetiniń málimdeýinshe, respýblıkadaǵy barlyq 27 memlekettik qazaq-túrik lıseıi burynǵysha jumysyn jalǵastyra beretin bolady, onda oqıtyn oqýshylardyń ata-analaryna balalary úshin jańa mektepter izdestirýdiń qajeti bolmaıdy.
«Qazaqstandaǵy qazaq-túrik lıseıleriniń Túrkııaǵa eshqandaı qatysy joq, olardaǵy oqý saıasaty qazaqstandyq jáne halyqaralyq bilim berý standarttary negizinde jasaldy. Qazaq-túrik lıseıleriniń áreketine baqylaý jasaıtyn halyqaralyq KATEV qoǵamdyq qory Qazaqstan men Túrkııanyń prezıdentteri Nursultan Nazarbaev pen Turǵyt О́zaldyń qoldaýlary arqasynda eki eldiń bilim berý júıesindegi ekijaqty kelisim negizinde quryldy. Osy jyldarda qazaq-túrik lıseıleri oqýshylardyń joǵary úlgerimin qamtamasyz etip, elimizdiń oqý oryndary arasyndaǵy flagmanǵa aınaldy», - delingen baspasóz qyzmetiniń habarlamasynda.
Sońǵy úsh jyldyń ishinde qazaq-túrik lıseısleriniń oqýshylary 5327 medalge qol jetkizdi, olardyń 986-sy Brazılııa, AQSh, Reseı, Ońtústik Koreıa, Qytaı, Rýmynııa, Kanada, Grekııa, Grýzııa, Germanııa, Japonııa elderinde ótken halyqaralyq olımpıadalarda jeńip alyndy. QTL-da 1 124 oqytýshy jumys isteıdi, olardyń 1 030-y Qazaqstannyń (91,7%), 94-i Túrkııa azamattary (8,3%) bolyp tabylady.
Bilim jáne ǵylym mınıstrliginiń anyqtamasynda sondaı-aq qazaq-túrik lıseıleri qazaq tilinde bilim alatyn daryndy balalardyń oblystyq lıseı-ınternattary bolyp tabylaytyn atap kórsetilgen. Bıylǵy jyly qazaq-túrik lıseılerin 1634 bala bitirdi. Olardyń orta baǵalary 102,3 baldy qurady. 2016 jylǵy UBT qorytyndysynda 27 qazaq-túrik lıseıi túgel respýblıkadaǵy 100 úzdik mekteptiń quramynan oryn aldy.
Qazaq-túrik lıseılerindegi tárbıe jumysy Qazaqstan Respýblıkasynyń úzdiksiz bilim berý tujyrymdamasyna, «Máńgilik el» jalpyulttyq ıdeıasyna, Qazaqstan Prezıdentiniń «Qazaqstan-2050» Joldaýyna sáıkes júzege asyrylady.
«Qazaq-túrik lıseıleriniń otandyq bilim berý salasynda ózindik orny bar jáne olardyń qyzmetin basqa eldiń saıası ahýalyna qatysty baılanystyrýdyń qajeti joq. Syrttan olarǵa qysym jasaýǵa eshkim de quqyly emes, olar - Qazaqstan mektepteri men Qazaqstan azamattary, - delingen mınıstrliktiń málimdemesinde. - Biz resmı túrde málimdeımiz, QTL men «KATEV» qorynda ózge elderdiń jeke tulǵalarymen, uıymdarymen jáne úkimetterimen eshqandaı baılanys joq».
Murat AITQOJA