Tamyzdyń 7-si kúni túnde Rıo-de-Janeıroda ótip jatqan Olımpııalyq oıyndarda qazaqstandyq aýyr atlet Arlı Chonteı 56 kıloǵa deıingi salmaq dárejesinde synǵa túsip, tórtinshi oryn aldy.
Bizdiń sportshy birinshi jattyǵý – julqa kóterýde 130 kg salmaqpen besinshi orynǵa turaqtady. Ol serpe kóterýde de salmaq úzdikterimen básekege túse almady. Birinshi talpynysta 148 kg salmaqty baǵyndyrǵan Arlı sonymen turyp qaldy.
Osylaısha qossaıys boıynsha 278 kg salmaq jınaǵan qazaqstandyq atlet jalpy esepte tórtinshi tuǵyrdan tabyldy. Al Olımpıada chempıondyǵy ataǵyn qossaıystaǵy 307 kg jıyntyǵymen qytaılyq Lon Sıngýan jeńip aldy. Ekinshi orynǵa 303 kg kótergen KHDR sportshysy Iýn Chol Om ornalasty. Úshinshi satyǵa 289 kg salmaqpen taılandtyq Sınfet Krýaıtong jaıǵasty.
Aıta ketýimiz kerek, Lon Sıngýan osy kórsetkishi arqyly álem rekordyn jańartty. Al serpe kóterýdegi 170 kg salmaǵy Olımpıadanyń jańa rekordy bolyp tabylady. Ol túrik Halıl Mýtlýdyń 2000 jyly Sıdneıde jasaǵan álemdik rekordyna (305 kg) ózgeris engizdi.
Damır QOJAMQUL
Tehnıkalyq nátıjeler
XXXI jazǵy Olımpıada. Rıo-de-Janeıro (Brazılııa), 7 tamyz
Aýyr atletıka. Erler. 56 kg. 1. Lon Sıngýan (Qytaı) – 307, álem rekordy (137+170). 2. Iýn Chol Om (HNDR) – 303 (134+169). 3. Sınfet Krýaıtong (Taıland) – 289 (132+157). 4. Arlı Chonteı – 278 (130+148).