[caption id="attachment_55074" align="aligncenter" width="560"] Foto: bnews.kz[/caption]
«Ardos-Júrek» múgedekter birlestiginiń bastamasymen óńirde «Inklıýzıvti bilim – bolashaqqa bastar jol» jobasynyń tusaýy kesildi.
Soltústik Qazaqstan oblytyq bilim basqarmasynyń habarlaýynsha, qalalyq demalys oryndarynyń birinde ornalasqan oqý-damytý lagerinde 50-ge jýyq júrip-turýy qıyn balalar túrli paıdaly istermen shuǵyldanady.
Qazaqstannyń Birinshi Prezıdenti qorynyń qoldaýyna ıe bolǵan jobany júzege asyrýshylardyń biri – «Ardos-Júrek» múgedekter uıymy.
Uıym jetekshisi Aqjan Kárimniń aıtýynsha, baǵdarlamany qarjylandyrýǵa 2 mıllıon teńge grant jumsalyp, onyń aıasynda ınteraktıvti semınarlar, trenıngter, mýzykalyq, art-jattyǵýlar, oıyn terapııalary jumys isteýde.
«Aıaq-qoly bútin, densaýlyǵy jaqsy qatarlastaryna qaraǵanda múmkindigi shekteýli balalar ózderin kem sezinip, jasqanshaqtap turatyny jasyryn emes. Osyndaı áleýmettik teńsizdikterge jol bermes úshin ınklıýzıvti bilim berýdiń artyqshylyqtaryn paıdalana otyryp, olardyń aınalasyna degen qyzyǵýshylyǵyn oıatyp, qorshaǵan ortaǵa beıimdeý, qabylet-qarymdaryn ashý bizdiń basty maqsatymyz», – deıdi psıholog maman Ǵalııa Baıazıtova.
Qyzyljar óńirinde qolǵa alynǵan qanatqaqty baǵdarlamany uıymdastyrýshylar keleshekte mektep baǵdarlamasy sheńberinde úıde bilim alatyn múmkindigi shekteýli balalardy onlaın oqytý júıesimen qamtýdy kózdep otyr. Mundaı sanattaǵy baldyrǵandardyń sany aımaqta 150-ge jýyq.
О́mir ESQALI