Rıo-de-Janeıroda ótip jatqan Olımpııalyq oıyndardaǵy boks týrnıriniń 1/8 fınalynda 49 kg salmaqtaǵy qazaqstandyq Birjan Jaqypov namıbııalyq Matıas Hamýnıelamen kezdesip, 3:0 esebimen utty.
Shaıqas tartysty ótti. Biraq onyń árbir raýndynda álem chempıony, tájirıbeli Birjannyń basymdylyǵy aıqyn bilinip turdy. Munyń aldynda ázerbaıjan Rýfat Gýseınovti jarys jolynan shyǵaryp tastaǵan afrıkalyq boksshy qara qabylan sekildi qanshama ret atyla shabýylǵa shyqqanymen, soqqylary dóp tımeı jatty. Munyń esesine, qazaqstandyq bylǵary qolǵap sheberiniń dáldegeni jetýmen boldy.
Endi Birjan Jaqypov osynyń aldynda meksıkalyq Ioselıto Velaskýesti 3:0 etip utqan óziniń ejelgi qarsylasy, ózbek Hasanboı Dýsmatovpen ushyrasady. Onda jeńgen boksshy medaldiń aýylyna enedi.
Damır QOJAMQUL