DÚBIR

Qorjynda – bir kúmis,  bir qola medal Dzıýdoshylarymyz jeńedi dep kelip edik. Olımpıadanyń alǵashqy kúnin altyn júldemen bastaýǵa úmittiń jeteginde kelgen basqalar sııaqty bizdiń de múmkindigimiz bolǵan. Eldos Smetov – ústinen qylaý túspegen sý jańa álem chempıony. Otgonseseg Galbadrah qyzymyz óz salmaǵynda álemdegi úshtikke kiredi. Sondyqtan basy Mádenıet jáne sport mınıstri Arystanbek Muhamedııauly bolyp barlyǵymyz dzıýdodan ótetin jarysqa keldik. О́zimizdiń balýandar shyqqanǵa deıin ózge elderdiń úkilep ákelgen úmitterin tamashalap otyrmyz. 60 kılo salmaqta fransýz ben brazılııalyq balýandar saǵyzdaı tartysyp jatyr. Referı sylbyrlaý kúreskeni úshin alań ıesi Kıtadaǵa eskertý bergen. Kúres aıaqtalýǵa 40 sekýnd qalǵanda, Kıtada yshqynyp kelip, qyrqa shaldy. Álginde ǵana kóńili toq júrgen fransýz ókirip jibere jazdady-aý. Jaraly arys­tandaı shabynǵanymen, endi bári kesh edi. Ol endi aýylyna qaıtady. Tórt jyldyq arman osy jerde adyra qaldy. Bizdiń Galbadrah qyzymyz da kóńilimizge qaıaý túsire jazdady. Silkinip keýdesin kerip shyqqan jerlesimiz alǵashqy kezdesýinde-aq jarys jolynan shyǵyp qalýǵa shaq qalǵan. Shıdo aldy, ol azdyq etkendeı, qarsylasyna vazarıı ustatyp jiberdi. Bárimiz ysh­qynyp qaldyq. Abyroı bol­ǵanda, ol esin tez jınap, negizgi ýaqyttyń upaılaryn teńestirip, altyn upaıǵa kúresýge mursat aldy. Shabýyldap júrip jeńdi-aý áıteýir. Eldos erdiń soıy ekendigin qashan da dáleldep júr. Biraq Olımpııalyq oıyndar osy dodada buryn top jarǵandarǵa da, bir emes, birneshe dúrkin álem chempıondaryna da: «Kelip qalypsyz uıat bolar, jol sizdiki», dep syzylyp turmaıdy. Shyn myqtysyń ba, basqa jerde emes, osy tatamıde dálelde. Birinshi topta reseılik Beslan Mýdranov jolyndaǵyny qıdaı sypyryp keldi. Ekinshi topta bizdiń batyr myqty boldy. О́zbek jigiti Dıarbek Orazboev – óte tásilqoı balýa­n. Eldos ońtaıy kelgende Dıarbekti tobyqtan qaǵyp, bir búıirine sulatty. Qasymyzda demin ishine tartyp otyrǵan ózbek aǵaıyndar basyn ustady, biz aspanǵa sekirdik. Aqtyq aıqasqa shyǵar bas­paldaqta Eldos ázerbaıjan balýa­ny Orhan Safa­rovpen beldesti. Orhan – uzyn boıly, Eldosqa deıin qarsylastaryn qoǵadaı japyryp kelgen. Olar bir-birin ala almaı kóp júrdi. Kezdesý aıaqtalýǵa az qalǵanda, Eldos Orhonnyń eki qolyn baılaı ustaǵan qalpy shalqalaı bere tobyqtan qaqty. Iýko. Jalqy da bolsa ıpponǵa bergisiz altyn upaı. Orhan jeńistiń qolynan sýsyp bara jatqanyn jan dúnıesimen sezinip alǵa qaraı umtyldy. Mundaıda «kelseń kel» abyroı bermeıdi. Eldos durys taktıka tańdady. Úsh shıdo alǵanymen, batyrymyz fınalǵa ótti. Fınalda, aldyn ozyp aıtar bolsaq, terezesi teń kúres boldy. Qaıta bizdiń jigit alymdylaý, belsendileý bolǵan. Qandaı tamasha ádisteri sońyna deıin oryndalmaı jatty. Tartys Beslan Mýdranovtyń myqtylyǵyn taǵy tanytty. Beldesý altyn upaıǵa ketti. Taý jigiti tobyqtan oń­dyr­maı qaqty. Eldostyń aýyr­synyp qalǵanyn baıqap otyrmyz. Sharshaǵany da sezilip tur. Joq, sonda da qaıtpaı keýdelep ishke endi. Shalyp jyqpaqqa árekettengen. Beslan áýede óz paıdasyna aýdaryp ketti. Tobyqtan qaǵyp, óz paıdasyna ıýko jazdy. Álginde ǵana kóz aldymyzda, qol jeter jerde turǵandaı kóringen altyn jarq etip, alqalap otyrǵan qarsylastyń qolynda ketti. Átteń, bul altyn medal reseılikterdiń almaı júrgen altyn júldesi emes qoı. Bizdiń qazaqqa aýadaı kerek edi. Eldos qazaq sport tarıhynyń altyn paraǵyn ashýǵa daıyn bolatyn. Kúshi de jetip turdy. Negizgi ýaqytta bel­sendi bolǵanyn aıttyq, sol ýaqytta tóreshi qurǵyr reseılikke bir shıdo berip jiber­gende, Qazaqstanda qyryq kún toıyn, qyryq kún oıyn ótkizer ulan-asyr toı bolar edi. Galbadrah sońǵy Grand-slam báseke­leriniń bárinde bas júlde aldy dese bolady. Ekiden tómendegen kezi bolǵan joq. Shırek fınalda japonnyń álem chempıony Amı Kondony belden qapsyra ustap bir emes, eki ret laqtyrdy. Kondo birinde etpetimen túskenimen, ekinshisinde bir jaýyrynymen jyǵyldy. Vazarı. Qazaq kúresiniń tilimen aıtqanda, jartylaı jeńis. 50 sekýnd ýaqyt qalǵan. Mundaıda tájirıbeli balýandar shıdo almas úshin belsendilik kórsetkendeı, qolǵa jabysyp, ońdy-solǵa súırep júrip alady. Bizdiń qyz Kondonyń yńǵaıyna qaraı kúresip ketti. Ekeýi umar-jumar qulaǵan. Galbadrah aıaqqa jarmasyp, tartyp jatqandaı edi, aıyrylyp qaldy. Jyryndy álem chempıonyna osynyń ózi jetkilikti edi. Keýdesine shyǵyp jatyp aldy. 20 sekýnd ustasa ıppon, taza jeńis. Japon odan aıyryla qoımas. Galbadrah úshinshi oryn úshin kúreste eshkimdi boıyna teń kórgen joq. Jubanysh básekesiniń alǵashqy beldesýinde majar qyzyn, London Olımpıadasynyń qola júldegeriniń eki qolyn tas qylyp baılap aldy da, artqa qaraı serpe kóterip shalqalaı laqtyrdy. Ippon. Qola medal úshin tartysta óziniń jerlesi, álemdegi úzdik Mýnghbat ákpesin júldesiz qaldyrǵan, fınalǵa óter jerde súrinip, ózin kútip turǵan kýbalyq Maestro Alvarespen tatamıge shyqty. Eki shıdo aldy. Jarys osylaı aıaqtalsa, jeńis qara marjanda. Bizdiń qyz va-bankke ketti. Ýaqytty saǵyzdaı sozyp júrgen Alvaresti qursaýdaı qysyp, yńǵaıyna keltirdi de, tobyqtan qaǵyp, top etkizdi. Vazarı. Qyl­pyldap otyrǵan bizdiń kóńil de toǵaıyp qaldy. Al qola medal sálden keıin qolymda boladyny oılap úlgergen Alvarestiń kóńil kúıin qudaıym eshkimge bermesin. Altyn medal argentınalyq Paýla Paretonyń oljasy eken. Asylyq aıtpaıyq, bizdiń kóńili­mizde Galbadrah odan myqty kórindi. Jarystan soń jeńimpaz ben júldegerler baspasóz orta­ly­ǵyn­da dúnıe júzinen jınalǵan jýrnalısterdiń aldynda suhbat berdi. Galbadrah Kondomen kú­reste orny tolmas qatelik jiber­genin, óziniń utyp jatqanyna maldanyp qalǵanyn aıtty. Syrt kózge shynashaqtaı kórinetin osy shymkenttik qyzdyń boıynda alapat kúsh bar. Qudaı qosh kórse, bul qyz Olımpıada «altynyn» almaı qoımaıdy. Qazaqstan maǵan senip, quramaǵa shaqyrdy. Bapkerimiz ekeýimizge barlyq jaǵdaıdy jasady. Jarys kezinde meni qoldaǵan jerlesterimizdi, Qazaqstan Týyn kóp kórdim. Sol úshin úlken rahmet aıtamyn. Bolashaqta da qazaq elin jaqsy jeńisterimmen qýanta beremin dep oılaımyn – dedi qola júldeger. Eki kúngi jarysty qorytyn­dylaıtyn bolsaq, 237 shaqy­rym­dyq toptyq jarysta velo­sha­bandozymyz Andreı Zeıs 142 sportshylardyń arasynda alǵashqylardyń biri bolyp top basyna shyqqan. Alaıda, márege jaqyndaǵanda, kúshi jetpeı qal­dy. «Barymdy saldym, aıanǵanym joq. Shy­­nymdy aıtsam, Londondaǵy Alek­sandr Vıno­kýrov sekildi bas júlde alýdy armandaǵanymdy da aıtaıyn. Kúshim sońyna deıin jetpedi, buıyrǵany osy eken», dedi. 100 metr qashyqtyqta sýǵa júzý­shimiz Dmıtrıı Balandın segizinshi orynmen fınalǵa ótti. Al Zúlfııa Chınshan­lony almastyrǵan aýyr atlet Margarıta Elıseevanyń medal alýǵa múmkindigi bar edi. Ol julqa kóterýde – 80, serpe kó­­terýde 106 kılo nátıjesimen 5-orynǵa shyqty. Bas bapker Alekseı Nı Margarıtanyń jat­tyǵýda julqa kóterýden 90 kı­loǵa deıin kóterip júrgendigin aıtqan. Osyndaı iri dodaǵa alǵash qatysqan qyz tolqýyn basa al­maǵan syńaıly. Al alǵashqy kúni sharshy alańǵa shyqqan Berik Ábdirahmanov ame­rıkalyq jas peri Karlos Balderasqa esh­qandaı qaırat kórsete almady. Karlos jyl­damdyǵymen shaldyrmaı ketti. Bas bap­ker Myrzaǵalı Aıtjanov ta osyny aıtady. Ekinshi kúni medal alýǵa úmit­tiler ishinen dzıýdoshy Jan­saı Smaǵulov pen aýyr atlet Arlı Chonteı atalǵan. Alaıda, alǵashqy kezdesýinde jyryndy Iаsper Lefevrany jolynan ysyrǵan Jansaı keleside álem chempıony japon An Ba Ýlýǵa qaırat kórsete almady. Al Arlı Chonteı qossaıys qory­tyndysynda tórtinshi oryndy qanaǵat tutty. «Egemen Qazaqstannyń» arnaýly tilshisi Baqtııar TAIJAN Rıo-de-Janeırodan habarlaıdy Júldeler jıyntyǵy (8 tamyzdaǵy málimet boıynsha) № Quramalar Altyn Kúmis Qola Barlyǵy 1 AQSh 3 5 4 12 2 Qytaı 3 2 3 8 3 Avstralııa 3 0 3 6 4 Italııa 2 3 2 7 5 Koreıa 2 2 1 5 6 Vengrııa 2 0 0 2 7 Reseı 1 2 2 5 8 Ulybrıtanııa 1 1 0 2 8 Shvesııa 1 1 0 2 10 Japonııa 1 0 6 7 11 Taıland 1 0 1 2 11 Taıpeı 1 0 1 2 13 Argentına 1 0 0 1 13 Belgııa 1 0 0 1 13 Kosovo 1 0 0 1 13 Nıderland 1 0 0 1 13 Vetnam 1 0 0 1 18 Kanada 0 1 1 2 18 Qazaqstan 0 1 1 2 20 Brazılııa 0 1 0 1 20 Danııa 0 1 0 1 20 Fransııa 0 1 0 1 20 Indonezııa 0 1 0 1 20 Jańa Zelandııa 0 1 0 1 20 Fılıppın 0 1 0 1 20 Ońtústik Afrıka 0 1 0 1 28 О́zbekstan 0 0 2 2 29 Ispanııa 0 0 1 1 29 Grekııa 0 0 1 1 29 Polsha 0 0 1 1 Vetnam tarıhyndaǵy tuńǵysh altyn medal Rıo-de-Janeırodaǵy Olımpııalyq oıyndardyń birinshi kúni Vetnam sportshylary ózderiniń tarıhyndaǵy birinshi olımpııalyq altyn medaldy jeńip aldy. Oǵan mergen Hoang Sýn Vın qol jetkizdi. Vetnam myltyq atýshysy budan tórt jyl buryn Londonda sátsizdikke ushyraǵan sportshynyń biri boldy. Onyń áýelgide pnevmatıkalyq tapanshamen atýda fınalǵa shyǵýyna bir ǵana oǵy jetpeı qaldy, sosyn tapanshamen 50 metrlik nysanany kózdeýde qola medal alýǵa 0,1 baly kem bolyp shyqty. Al Rıo tórinde Hoang Sýn Vın birinshi jarys kúni-aq pnevmatıkalyq tapanshamen atýda altyn medal jeńip alyp, Vetnamǵa óziniń tarıhyndaǵy birinshi altyn medaldy alyp berdi. Kásipqoı sportshy jarystan shyǵyp qaldy Kásipqoılardyń bokstan orta salmaqtaǵy burynǵy chempıony, fransýz Hassan N`Dam N`Jıkam (34-2, 20 KO) Olımpıada shyńyn baǵyndyrýǵa bastaǵan joryǵyn abyroısyz aıaqtady. Kásipqoılar sapyna ótkesin 12 jyldan keıin berilgen múmkindikti paıdalanýǵa umtylǵan ol 1/16 fınalda brazılııalyq Mıshel Borhestiń tegeýrinine qarsy tura almady. 32 jastaǵy bul boksshy Olımpııalyq oıyndarda baǵyn synap kórmek bolǵan kásipqoılar arasyndaǵy eń ataqtysy kórinedi. Ol ekinshi, úshinshi raýndtarda qatty qımyldady. Biraq onyń qarsylasy osy kezde soqqyny budan da kóp jasap úlgerdi. Buǵan jergilikti jankúıerlerdiń Borhesti qatty qoldaýy da áser etken sııaqty. Irland boksshysy dopıngpen qolǵa tústi Rıo-de-Janeıroda ótip jatqan Olımpııalyq oıyndarda Irlandııanyń orta salmaqtaǵy  Maıkl O’Reıllı esimdi boksshysy dopıngpen ustalyp qaldy. Shamasy, ol endi Olımpıadaǵa qatysa almaıtyn shyǵar. Irlandııanyń amator boksy federasııasy 23 jastaǵy Maıkl O’Reıllıdiń Rıo-de-Janeıroda alynǵan dopıng tekseriminen óte almaı, Oıyndarǵa qatysýdan ýaqytsha alastatylǵanyn málimdedi. Endi boksshy V synamasynyń ashylýyn kútip otyr. Osydan keıin ony resmı túrde Oıyndardan alastatý nemese dıskvalıfıkasııa jasaý ne kinásizdigin atap kórsetý sharasy jasalady. Eger tyıym salynǵan preparattar paıdalanǵany rastalsa, ol Olımpıadadaǵy dopıngke baılanysty alastatylǵan birinshi sportshy bolǵaly tur. O’Reıllı óziniń birinshi jekpe-jegin 12 tamyzda ótkizýi tıis edi. Damır QOJAMQUL Enshisi eren Eldos Qazaq jastary arasynda dzıýdodan tuńǵysh álem chempıony atanǵan Eldos Smetov Rıodaǵy Olımpıadanyń birinshi jarys kúninde kúmis medalǵa qol jetkizip, Ashat Jitkeevtiń 2008 jylǵy Beıjińdegi jetistigin qaıtalady. Ol fınalda Beslan Mýdranovpen beldesýdiń qosymsha ýaqytynda bir ádiske túsip qalyp, bas júldege jete almaı qaldy. Degenmen, el-jurty Eldostyń osy kúmis medaliniń ózin úlken tabysqa balap, qatty qýanyp jatyr. Bizdiń búgingi keıipkerimiz 1997 jyly 5 jasqa tolǵan kezinen Tarazdaǵy dzıýdo kúresimen aınalysa bastaıdy. 1992 jyldyń qyrkúıek aıynda T. Rysqulov aýdany, Jalpaqsaz aýylynda týǵan enshisi eren Eldos alǵashqy bapkeri Ahmet Jumaǵuldyń qolyna túskennen bastap, dzıýdony janyna serik etip keledi. Onyń Almatyda ótken jarys­tan alǵash ret oljaly oralýy otbasynda kishigirim toı bolǵan eken. Birinshi oryn alǵan oǵlan qolyndaǵy maqtaý qaǵazyn ustap úıine keledi. Balasynyń jeńisine qýanǵan ata-anasy shattyqtan týys­taryn shaqyryp, kóńildi otyrys ta jasapty. – Kishkentaı kezimnen tek qana birinshi oryn alamyn degen úlken maqsat qoıǵanmyn. Bes jasymnyń ózinde qolymmen jerdi tirep júre alatynmyn. Jáne sol jasymnyń ózinde túrli saltolardy qınalmaı jasap, shpagatqa erkin otyratynmyn. Aǵalarym Baqbergen, Jandospen jattyǵý zalyna barǵan kezimde ózim biletin sporttyq elementterge qosymsha, jańasha bir dúnıeler qosyp ónerimdi kórsetip jatqanymda, jattyqtyrýshym Ahmet Jumaǵuldyń: «Myna bala kim?» dep tańyrqaı qaraǵany jadymnan óshpek emes. Sol zaldaǵy dzıýdo kúresiniń tásilderi maǵan birden unady. Kóńilime qondy. Jattyǵyp júrdim. Ýaqyt óte kele otbasymnan kásipqoı sportshy bolyp men ǵana qaldym, – deıdi ótken shaqty eske alyp Eldos. Eldostyń jarqyn jeńisteriniń biri – 2014 jyly Ońtústik Koreıa­nyń Inchhon qalasynda ótken Azııa oıyndaryndaǵy altyn júldesi. Atalmysh dodaǵa tyńǵylyqty daıyndalǵan saıypqyran Azııa oıyndarynda atoı salý úshin Chelıabınskide ótetin álem chempıonatyn «qurbandyqqa» shalyp jiberdi. Tórt jylda bir ótetin qurlyqtyq dodada qarsy­lastarynyń aldy bolýdy maqsat etken Eldos úshin bul synnyń bási joǵary bolatyn. Mun ol aqtyq synda mońǵoldyń myqty balýany Boldbaatar Gan­batty sabasyna túsirip, chem­pıondyq ataqqa qol jetkizdi. Osy­laısha ol Azııa oıyndarynda dzıýdo kúresinen alǵash ret chempıon atanǵan qazaq balasy retinde tarıhqa endi. Azııa oıyndarynda óziniń shyn myqty ekenin dáleldeı bilgen Eldos­ty alda úlken dodalar kútip turdy. Gran-prı jarystarynyń kezekti kezeńderi men Masters dep atalatyn týrnırlerdi bylaı qoı­ǵanda, Smetov úshin eń mańyz­dy doda Astanada ótetin álem chempıo­naty edi. Bul jarysta da top jarǵan ol  tuńǵysh ret dzıýdo kúresinen qazaq oǵlandary arasynan shyqqan álem chempıony ataǵyna qol jetkizdi. Osylaısha lısenzııanyń túp­kilikti taǵdyryn Azııa chempıonatynda sheship edi. Oralhan DÁÝIT, «Egemen Qazaqstan», Tabıǵat ABAILDAEV, Jýrnalıst Jambyl oblysy Denız Búgingi keıipkerimiz – De­nız! Túrik teleserıalyndaǵy Denız esimdi keıipker eken dep oıla­mańyz, jo-joq, ol emes. Rıo Olımpıadasynda el namysyn qorǵaıtyn otandasymyzdyń esimi – Jansel, tegi – Denız. Túrkııada boı túzegen qaryndasymyz Mus­tafa О́ztúrik elimizde negizin qalaǵan taekvondo sportyn janynan serik etipti. Onyń anasy da sportshy, dzıýdodan sport sheberi atanǵan. Jansel 6 jasynda anasymen birge Túrkııaǵa kóshken. Anasy sol elde turady. Janseldiń ózi sportpen dos­tyǵyn voleıbolmen bastaǵan. Al 2009 jyly taekvondo sporty­nyń seksııasyna barypty. So­dan beri taekvondamen talmaı jat­tyǵyp keledi. Birneshe ret Túrkııanyń chempıony atanǵan. Eýropa men ózge elderde ótken halyq­aralyq týrnırlerde de qar­sylastaryn qapy qaldyryp, óz salmaǵynda top jarǵan. Onyń qımylynyń shıraqtyǵy men jeńiske degen talpynysy bilikti jattyqtyrýshylardyń nazaryna ilingen. Taekvondoshy qyzdyń sporttaǵy jetistigine kóńil aýdar­ǵandardyń qatarynda Beıjiń Olım­pıadasynyń qol júldegeri Arman Shylmanov ta bar. Shyn myqtyny qapysyz tanıtyn Olımpıada júldegeri Janselmen tanysyp, oǵan Qa­zaq­stannyń namysyn qorǵaýǵa usynysyn bildiripti. Taekvondoshy qaryndastyń usynystan bas tartpaýyna eki jaıt sebep bolsa kerek. Birinshiden, kindik qany tamǵan týǵan elge oralý múmkindigi, ekinshiden, Olımpıada júldegeriniń ózinen tálim alý ekiniń biriniń mańdaıyna jazyla bermeıtin baq emes pe? Ras, anasymen de keńesipti. Sóıtip, elge oraldy. Ony elde Arman Shylmanovtyń ózi jattyqtyrýdy qolǵa aldy. Týǵan eldiń, týǵan jerdiń qadiri alysta júrgende sezi­ledi ǵoı. Jansel de eldiń ys­tyq yqylasyn da, týǵan jer­diń tynysyńdy keńeıter jupar aýasyn da saǵynypty. Elge saǵynysh jetelep kelgen Janseldi Arman Shylmanovtaı Olımpıada júl­degeri túlep ushqan Atyraý jurt­shylyǵy qushaq jaıa qarsy aldy. Judyryqtaı júregi alyp ushyp jetken qaryndastyń taryqpaýy úshin jańadan boı kótergen shaǵyn aýdannan bir bólmeli páter berildi. Qolyna bir mıllıon teńge aqshalaı syıaqy ustatyldy. Jansel elge oralǵanda, Aty­raýdy tańdapty. Nege? Munyń mánisi mynada: elimiz táýelsizdik alǵan tusta, taekvondonyń has sheberi Mustafa О́ztúrik al­ǵash ret óz mektebin dál osy Aty­raýda ashqan edi. Sodan beri bul óńirdegi taekvondo mektebinen Qazaqstannyń kók baıraǵyn talaı márte bıikke kótergen tarlan taekvondoshylar túlep ush­ty. Olardyń qatarynda Beı­jiń Olımpıadasynyń qola júldegeri Arman Shylmanov, Beıjiń Olımpıadasynyń qaty­sýshysy Lııa Nurkına, London Olımpıadasynda atoılaǵan Gúl­nafıs Aıtmuhambetova bar. Mi­ne, álemdik dodalardan udaıy jeńispen oralǵan osyndaı taek­vondoshylardyń jolyn jalǵaǵan Janseldiń de baǵy jandy. Aldymen Manılada ótken lı­senzııalyq týrnırdegi jekpe-jekte oǵan qaırat kórseter qar­sylas shydamady. Baby da kelisip, baǵy da janǵan Jansel sol týrnırde elimizdiń kók baıraǵyn jelbiretip, Ánuranyn shyrqatyp ǵana qoımaı, Olımpıada oıyn­dary­nyń joldamasyn utyp al­dy. Budan soń Koreıada ótken oqý-jattyǵý jıynyna attandy. Bireshe halyqaralyq týrnırlerde kók baıraqty kókte jelbiretti. – Endi Janseldiń Olımpıadada Qazaqstannyń qorjynyna júlde salaryna bek senimdimiz. Ol bul dodaǵa tyńǵylyqty daıarlandy. Oǵan barsha otandasymyz úmit artyp otyr. Ol el úmitin aqtaıdy, – dedi jaqynda gazet tilshisine Beıjiń Olımpıadasynyń qola júl­degeri, belgili taekvondoshy Arman Shylmanov. Jigeri myqty Janseldiń baǵy janǵaı! Joldasbek ShО́PEǴUL, «Egemen Qazaqstan» ATYRAÝ