Qarýsyzdaný ıdeıasyn qoldaıtyn forým

29 tamyzda Astanadaǵy Táýelsizdik saraıynda Semeı ıadrolyq synaq polıgonynyń jabylýyna 25 jyl tolýyna arnalǵan «Iаdrolyq qarýsyz álem qurý» halyqaralyq konferensııasy uıymdastyrylǵaly otyr. Forým BUU Bas Assambleıasynyń qararyna sáıkes jyl saıyn atalatyn Iаdrolyq synaqtarǵa qarsy is-qımyldyń halyqaralyq kúni aıasynda ótedi. Qazaqstan Respýblıkasynyń Prezıdenti Nursultan Nazarbaev­tyń konferensııada sóıleıtin sózi jıynǵa qatysýshylar nazaryn aýdaratyn basty oqıǵa bolmaq. Forým barysynda jalpy otyrys, sondaı-aq, «BUU jáne qarýsyzdaný úderisteri: keleshegi qandaı? «Álem. HHI ǵasyr» manıfesi», «Iаdrolyq tejeýden bas tartý – halyqaralyq qaýip­sizdiktiń jańa sıpaty», «Iаdrolyq qarýdan azat aımaqtar. Ornyqty álemniń geografııasy», «Iаdrolyq qarý­­syzdaný salasyndaǵy azamattyq qoǵam­nyń róli» taqyryptary boıyn­sha tórt paneldik sessııa ótedi. Kon­fe­rensııanyń qosal­qy uıymdasty­rýshysy Parlament­shilerdiń ıadro­lyq qarýdy taratpaý jáne joıý jolyn­daǵy (PNND) halyqaralyq uıymy bolyp tabylady. Forýmǵa qatysý­shylar ıadrolyq qarýdy qoldaný jáne synaý qurbandaryn eske alyp, qarý­syzdaný jáne taratpaýdyń ózekti má­selelerin qaraıdy jáne halyq­aralyq qaýipsizdikti nyǵaıtý jónindegi usynystaryn ortaǵa salady dep kútilýde. Konferensııany uıymdastyrý komıtetiniń basshysy, Senat Tóra­ǵasy Qasym-Jomart Toqaev­tyń pi­kirinshe, Semeı polıgonynyń jabylýyna 25 jyl tolýy jahandyq mańyzy bar data bolyp tabylady. «Qazaqstan Prezıdenti Nursultan Nazarbaev – jahandyq ıadro­lyq qarýǵa qarsy qozǵalystyń kósh­bas­shysy bolyp is júzinde moıyn­dalǵan tulǵa. Elbasynyń Semeı ıadrolyq polıgonyn tolyqtaı jabý týraly sheshimi – álemdik qa­rýsyzdaný tarıhynda alǵashqy jáne sońǵy mysal. Memleket basshysynyń «Álem. HHI ǵasyr» manıfesiniń negizinde qarýsyzdaný ıdeıasy jatyr. Semeı polıgonynyń jabylýyna 25 jyl tolýy – jer betinde ornyqty álem qurýdyń birinshi kezekte mańyzdylyǵy jáne qaýipsizdik problemalaryna jańa birlesken sheshimder usyný týraly búkil álemdik qoǵamdastyqqa oılanýdyń eń ońtaıly múmkindigi», – dep atap ótti Q.Toqaev. Astana konferensııasyna BUU Bas hatshysynyń orynbasary, BUU Jeneva bóliminiń Bas dırektory, Qarýsyzdaný jónindegi konferensııanyń bas hatshysy Maıkl Mıoller, Iаdrolyq synaqqa jal­pyǵa birdeı tyıym salý týraly shart uıymy Daıarlaý komıssııa­synyń atqarýshy hatshysy Lassına Zerbo, Parlamentaralyq odaqtyń Prezıdenti jáne  PNND teń tóraǵasy Saber Chaýdharı, Panafrıka Par­lamentiniń Prezıdenti Rodjer Nkodo Dang, Bolgarııanyń Vıse-pre­zıdenti Margarıta Popova, Mar­shall araldary Nıtıdjeliniń (Par­lament) tóraǵasy Kenef Kedı, Eý­ropa Komıssııasynyń burynǵy Pre­zıdenti jáne Italııa Premer-mınıstri bolǵan Romano Prodı, Izraıldiń burynǵy Premer-mınıstri Ehýd Barak, Avstrııanyń burynǵy federaldyq kansleri Al­fred Gýzenbaýer, Polshanyń buryn­ǵy Prezıdenti Aleksandr Kvas­nevskı, «Nevada-Semeı» antı­ıadrolyq qozǵalysynyń negizin salý­shy Oljas Súleımenov, basqa da ha­lyqaralyq uıymdardyń, úkimet­tik emes uıymdardyń kórnek­ti ókilderi, jalpy alǵanda, elýden astam eldiń belgili dinı qaırat­kerleri qatysady. Astana konferensııasynda qo­ry­tyndy qujat qabyldanatyn bolady. Sáýlebek BIRJAN