Qostanaıda jas boksshylardyń jazǵy jıyny ótti. Oǵan elimizdiń barlyq oblystarynan 40-tan astam sportshylar men jattyqtyrýshylar qatysty. Olarǵa AQSh-tyń Muhammed Álı ortalyǵynyń mamandary dáris oqyp, birneshe kún boıy jattyqtyrdy.
Bul jıyn Qazaqstan jáne AQSh boks federasııalarynyń arasyndaǵy yntymaqtastyq týraly memorandýmnyń aıasynda ótkizildi. Mundaı basqosý bıyl ekinshi ret ótip jatyr. Alǵashqysy naýryz aıynda AQSh-tyń Lýısvıll qalasynda ótken bolatyn. Sol kezde Qurama Shtattarǵa elimizden 12 jas boksshy baryp, Muhammed Álı ortalyǵynda jattyqty.
«Maǵan jıyn óte unady. Eń bastysy, ol babalardyń kóńilinen shyqty. Bir baıqaǵanym, balalardyń kóbisi jıynǵa alǵash ret qatysqan eken. Olar sheteldiń mamandarymen jáne elimizdiń jer-jerinen kelgen boksshylarmen tanysyp qaıtty. Osyndaı jazǵy lagerler kóp bolsa deımin», dedi jıynǵa qatysqan Arqalyq qalasynyń jattyqtyrýshysy Marat Seıitmaǵambetov.
Al Qostanaı oblysynyń jasóspirimder arasyndaǵy eki dúrkin chempıony Dına Qýanyshbaeva jazǵy lagerde amerıkalyq qonaqtarmen, Arqalyq, Aqtóbe, Taraz, Qaraǵandynyń jas órenderimen tanysqanyn, jıyn kezinde komandalyq trenıngterdiń unaǵanyn aıtty. «Komandanyń basty jetistigi – ol adamdardyń bir-birin syılaýy, qurmet kórsetýi, komandanyń basqa músheleriniń pikirin tyńdaýy. Eger osynyń komandada osynyń bári bolsa jeńiske qınalmaı jetýge bolady», deıdi jas bolsa da bas bola biletin sportshy qyz.
Dastan KENJALIN