Qazaqstan Respýblıkasynyń Birikken Arab Ámirlikterindegi elshisi Qaırat Lama Shárip Ámirlikterde akkredıttelgen dıplomatııalyq korpýs, Syrtqy ister mınıstrligi, kompanııalar men halyqaralyq uıymdar jáne buqaralyq aqparat quraldaryna arnap brıfıng ótkizdi.
Brıfıngtiń negizgi maqsaty shaqyrylǵandardy Qazaqstan Respýblıkasynyń halyqaralyq sahnadaǵy ózekti bastamalarymen tanystyrý boldy. Qazaqstandyq dıplomat brıfıngke qatysýshylarǵa Qazaqstan Prezıdenti Nursultan Nazarbaevtyń 2016 jylǵy sáýirde Vashıngtonda ótken Iаdrolyq qaýipsizdik jónindegi sammıt sheńberinde usynǵan «Álem. HHI ǵasyr» jalpy álemdik damýdyń jahandyq strategııasy boıynsha bastamasy týraly egjeı-tegjeıli habarlady.
Ǵalamdyq qaýipsizdik problematıkasy álemdik qoǵamdastyqtyń aldynda buryn-sońdy bolmaǵan mańyzǵa ıe jáne Qazaqstan Prezıdenti óziniń manıfesinde jahandyq beıbitshilik pen qaqtyǵystardy retteýge jetý úshin negizgi qadamdardy belgiledi. Brıfıngte elshilik tarapynan arab jáne aǵylshyn tilderinde shyǵarylǵan «Manıfest: Álem. HHI ǵasyr» broshıýrasy usynyldy.
Bul jerde elshi negizgi maqsaty azamattyq qoǵam men úkimettik emes jáne jastar uıymdaryn Iаdrolyq qarýdy synaýdy toqtatý jáne ıadrolyq qarýdy synaýǵa jappaı tyıym salý týraly sharttyń tezirek kúshine enýine járdemdesýge tartý bolyp tabylatyn Memleket basshysynyń – ATOM jobasy (Abolish Testing. Our Mission) bastamasynyń belsendi iske asyp jatqanyn atap ótti.
Q.Lama Shárip Qazaqstannyń qaýipsiz álem qurýdaǵy belsendi ustanymy álemdik qoǵamdastyq tarapynan moıyndalyp, qoldaýǵa ıe bolǵanyn habarlady. Munyń mysaly retinde Semeı polıgonynyń jabylýy men Qazaqstanda MAGATE týy astynda Tómen baıytylǵan ıadrolyq otyn bankin qurýdy aıtýǵa bolady.
Sonymen qatar, elshi brıfıngke qatysýshylarǵa ústimizdegi jylǵy 29 tamyzda Astanada Semeı ıadrolyq polıgonynyń jabylýynyń 25 jyldyǵyna arnalǵan «Iаdrolyq qarýsyz álem qurý» taqyrybyndaǵy halyqaralyq konferensııa ótetinin jáne oǵan bedeldi saıasatkerler, ǵalymdar men qoǵam qaıratkerleriniń qatysatynyn habarlady.
Qazaqstandyq dıplomat shet memleketter elshilerine ústimizdegi jylǵy maýsymda ótken 2017-2018 jyldarǵa BUU Qaýipsizdik Keńesiniń turaqty emes múshesin saılaýda Qazaqstannyń kandıdatýrasyna qoldaý kórsetkenderi úshin alǵysyn bildirdi.
Brıfıngtiń sońynda is-sharaǵa qatysýshylarǵa Qazaqstan Respýblıkasynyń syrtqy saıası bastamalaryna arnalǵan aqparattyq-ımıdjdik materıaldar taratyldy.
«Egemen-aqparat»