«Bireý toıyp sekiredi...» degen naqyldyń eskirmeıtin túri bar. Bul deńgeıdegilerdiń jas talǵamaıtynyn qaıtersiz.
Mynany qarańyz... 21 tamyz kúni Eńbekshilder aýdandyq ishki ister bólimine jergilikti turǵyn qońyraý shalyp, tanysynyń Eńbek aýylyndaǵy toǵanda demalýshylarǵa tapanshamen oq atyp jatqanyn, zardap shegýshilerdiń de barlyǵyn habarlaıdy. 53 jasta eken. Ata saqaly omyraýyna túskendeıin kisige kim senbesin. Tez arada tergeý-jedel toby oqıǵa ornyna jóneltilip, artynan IIB-nyń jeke quramy da jetip barǵan. Aınalanyń bári jiti tekserilip, jaqyn mańdaǵy aýyl turǵyndaryna suraý salyndy. Aqyrynda bul habardyń negizsiz ekendigi anyqtaldy.
Polıseıler: «Oý, mynaýyńyz qalaı?» – degen suraq qoıady ǵoı. Jaýaptyń túrin qarańyz – «Mas bolyp qalyppyn...». Osyny uıalmaı-qyzarmaı aıtqan kisiniń ústinen QR QK 419-babynyń 3-tarmaǵymen qylmystyq is qozǵaldy. Bul degenińiz, 3 jyldan 7 jylǵa deıin bostandyǵyn shekteý nemese osy merzimge bostandyǵynan aıyrý degendi bildiredi.
Endi «qaljyńbas» jastarǵa keleıik. Aýyldan oqý oqyp, bilim al dep jibergen 20 jastaǵy qyz «Kókshetaý sý arnasy» kásipornyna telefon shalady. Túngi bir jarymda. Ol úreıli daýyspen «Sý arnasynyń» aýlasyna bomba qoıylǵan dep habarlaıdy. Polısııa men tótenshe jaǵdaılar qyzmeti dúr silkinip kóterildi. It álekke túskenmen eshteńe tabylmady. Budan ne shyqty? Erikken qyz Kókshetaý qalalyq sotynyń úkimimen eki jylǵa shartty túrde bostandyǵynan aıyrylyp tyndy.
Dál osyndaı jaǵdaı Býrabaı jáne Aqkól aýdandarynda qaıtalandy. Eki jigit saýda úılerine jarylǵysh zat qoıylǵanyn habarlaǵan. Mundaıda «e, sony qoıshy» deýge bolmaıdy. Taǵy da jurtshylyqty dúrliktirip, arnaıy operasııa júrgizildi. Bul habardyń da shyndyqqa janaspaıtyny anyqtalǵan.
«Oılanbaǵan opyq jeıdi» degenimiz osy. Oılanaıyq, aǵaıyn!
Baqbergen AMALBEK,
«Egemen Qazaqstan»