Qazaqstan Prezıdenti Nursultan Nazarbaev Parlament Májilisiniń jalpy otyrysyna qatysty, dep habarlady Prezıdenttiń baspasóz qyzmeti.
Otyrys barysynda Memleket basshysy Premer-Mınıstr K.Másimov bastaǵan Úkimettiń otstavkasyn qabyl alǵanyn taǵy da atap ótti.
Sondaı-aq, Nursultan Nazarbaev K.Másimovke jáne Úkimet múshelerine atqarǵan jumystary úshin alǵys aıtyp, qyzmetterindegi kúrdeli kezeńge qaramastan alǵa qoıylǵan barlyq mindetterdiń oryndalǵanyn aıtty.
Konstıtýsııanyń 44-babyna sáıkes, Elbasy Parlament Májilisiniń qaraýyna Qazaqstan Respýblıkasy Premer-Mınıstri laýazymyna Baqytjan Saǵyntaevtyń kandıdatýrasyn usyndy.
– Oblystardyń, Astana men Almaty qalalary ákimderiniń qatysýymen ótken Úkimettiń búgingi keńeıtilgen otyrysynda jańa Mınıstrler Kabıneti sheshýge tıisti birqatar jańa mindetter qoıdym. Álemdik ekonomıka men saıasattyń qazirgi turaqsyzdyǵy jaǵdaıynda strategııalyq baǵdarlamalarymyzdy iske asyrýdy jalǵastyrý mańyzdy. Úkimetten barlyq baǵyt boıynsha naqty, saýatty jumys talap etiledi. Baqytjan Saǵyntaev jańa Úkimet jumysynyń sabaqtastyǵy men tıimdiligin saqtaý úshin laıyqty kandıdatýra dep oılaımyn, – dedi Nursultan Nazarbaev.
Májilis depýtattary Premer-Mınıstr laýazymyna usynylǵan B.Saǵyntaevtyń kandıdatýrasyn biraýyzdan maquldady.
B.Saǵyntaev kórsetilgen senim úshin alǵys bildirip, júktelgen mindetterdi oryndaýǵa bar kúsh-jigeri men bilimin jumsaıtynyn aıtty.
Baqytjan Saǵyntaev Qazaqstan úkimetiniń basshysy bolyp bekitildi. Onyń kandıdatýrasyn Májilis depýtattary maquldady dep habarlaıdy Egemen-aqparat. Memleket basshysy Baqytjan Saǵyntaevty Qazaqstan Respýblıkasynyń Premer-Mınıstri qyzmetine taǵaıyndaý týraly Jarlyqqa qol qoıdy.
«B.Á. Saǵyntaevty Qazaqstan Respýblıkasynyń Premer-Mınıstri qyzmetine taǵaıyndaý týraly» Jarlyq
Baqytjan Ábdiruly Saǵyntaev Qazaqstan Respýblıkasynyń Premer-Mınıstri bolyp taǵaıyndalsyn.
Qazaqstan Respýblıkasynyń Prezıdenti N.Nazarbaev
Baqytjan Ábdiruly Saǵyntaevtyń ómirbaıany men eńbek joly
1963 jyly 13 qazanda Jambyl oblysy Talas aýdany Úsharal aýylynda týdy.
S.M. Kırov atyndaǵy Qazaq memlekettik ýnıversıtetin bitirdi, ekonomıka ǵylymdarynyń kandıdaty.
Eńbek jolyn Alma-Ata halyq sharýashylyǵy ınstıtýtynyń saıası ekonomıka kafedrasynyń oqytýshysy bolyp bastady.
1988-1992 jyldar aralyǵynda S.M. Kırov atyndaǵy Qazaq memlekettik ýnıversıtetinde jumys istedi, assıstent laýazymynan áleýmettaný kafedrasynyń dosentine deıingi joldy ótti.
1992 jyldan 1998 jylǵa deıin kásipkerlik qyzmetpen aınalysty.
1998 jyly Jambyl oblysy ákiminiń orynbasary bolyp taǵaıyndaldy.
1999 jyldan 2002 jylǵa deıin Qazaqstan Respýblıkasynyń Shaǵyn bıznesti qoldaý jónindegi agenttigi tóraǵasynyń orynbasary, «Shaǵyn kásipkerlikti damytý qory» JAQ basqarmasynyń tóraǵasy, Qazaqstan Respýblıkasynyń tabıǵı monopolııalardy retteý, básekelestikti qorǵaý jáne shaǵyn bıznesti qoldaý jónindegi agenttigi tóraǵasynyń orynbasary laýazymdarynda qyzmet etti.
2002 jyldan 2004 jylǵa deıin Qazaqstan Respýblıkasynyń tabıǵı monopolııalardy retteý jáne básekelestikti qorǵaý jónindegi agenttigi tóraǵasynyń birinshi orynbasary bolyp jumys istedi.
2004 jyldan 2007 jylǵa deıin – Qazaqstan Respýblıkasynyń tabıǵı monopolııalardy retteý jónindegi agenttiginiń tóraǵasy boldy.
2007 jyldan 2008 jylǵa deıin Qazaqstan Respýblıkasy Premer-Mınıstri Keńsesiniń basshysy boldy.
2008 jylǵy 30 qyrkúıekte Pavlodar oblysynyń ákimi bolyp taǵaıyndaldy.
2012 jyldyń 20 qańtarynda – Qazaqstan Respýblıkasynyń ekonomıkalyq damý jáne saýda mınıstri bolyp taǵaıyndaldy.
2012 jyldyń 24 qyrkúıeginen bastap – «Nur-Otan» HDP Tóraǵasynyń birinshi orynbasary bolyp qyzmet etti.
2013 jyldyń 16 qańtarynda Memleket basshysynyń Jarlyǵymen QR Premer-Mınıstriniń birinshi orynbasary - О́ńirlik damý mınıstri bolyp taǵaıyndaldy.
2013 jyldyń 6 qarashasynda Memleket basshysynyń Jarlyǵymen Premer-Mınıstrdiń Birinshi orynbasary - QR О́ńirlik damý mınıstri qyzmetinen bosatylyp, QR Premer-Mınıstriniń Birinshi orynbasary bolyp taǵaıyndaldy.
«Qurmet» ordenimen jáne mereıtoılyq medaldarmen marapattalǵan.
Tabıǵı monopolııalar salasyn memlekettik retteý, shaǵyn jáne orta bıznesti damytý taqyryptaryna arnalǵan birqatar ǵylymı jumystyń avtory.
Úılengen, eki balasy bar.