Aqtóbede kúndizgi ýaqytta aýlada oınap júrgen kishkentaı qyzdy belgisiz adam aldap ertip ketpek bolǵan. Oqıǵa turǵyndardy alańdatyp, polısııa jedel áreketke kóshti, dep habarlaıdy Egemen.kz.
Aqtóbe qalasynda bala urlaý áreketine qatysty derek tirkeldi. Bul týraly jergilikti turǵyndar Dıapazon basylymyna habarlaǵan. Olardyń aıtýynsha, oqıǵa Eset batyr aýdanynda (burynǵy Nur-Sıtı) bolǵan.
Kýágerlerdiń málimetinshe, aýlada oınap júrgen kishkentaı qyzdy beıtanys boıjetken ózimen birge ertip ketpek bolǵan. Ol balany aldaý úshin «júr, saǵan saqına beremin» dep ýáde etip, tipti syrǵasynyń bar-joǵyn suraǵan. Bala barýdan bas tartqanyna qaramastan, belgisiz adam ony kóndirýge tyrysqan.
Qolaıly sátte qyz bala qashyp shyǵyp, jaqyn mańdaǵy dúkenge tyǵylǵan. Oqıǵa dúkenderdiń birindegi beınebaqylaý kamerasyna túsip qalǵan. Turǵyndar bul jaǵdaıdy birden polısııaǵa habarlaǵan. Sonymen qatar, olar aýladaǵy kameralardyń istemeıtinin aıtyp, balalar qaýipsizdigine alańdaýshylyq bildirgen.
Oqıǵaǵa qatysty Aqtóbe oblysy polısııa departamenti pikir bildirdi. Vedomstvonyń málimetinshe, kúdikti qyz ustalyp, polısııa bólimine jetkizilgen.
Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan keshendi tekserý júrgizilip jatyr. Quqyq qorǵaý organdary kúdiktiniń áreketine zań aıasynda baǵa berilip, tıisti sheshim qabyldanatynyn málimdedi.
Talǵardaǵy adam ólimi men bala urlyǵy: Ýchaskelik ınspektorǵa úkim shyqty