Memleket basshysy Gonkong arnaıy ákimshilik aýdanynyń qarjy mınıstri Djon Sangpen kezdesti. Bul týraly Aqordanyń baspasóz qyzmetine silteme jasaǵan Egemen-aqpart habarlady.
Kezdesýde «Astana» halyqaralyq qarjy ortalyǵyn qurý barysyndaǵy ózara is-qımyl máseleleri jan-jaqty talqylandy.
Elbasy sapardyń joǵary mańyzdylyǵyn, sondaı-aq Gonkongtyń qarjy, ınnovasııa jáne tehnologııa salalaryndaǵy tájirıbesiniń qundylyǵyn atap ótti.
– Gonkong álemdik jetekshi qarjy ortalyqtarynyń biri bolǵandyqtan, sizderdiń tájirıbelerińiz bizge asa qajet. Qazirgi ýaqytta biz qalyptasý kezeńin bastan ótkerýdemiz. Jalpy, ózara is-qımylymyz Qazaqstan men Qytaı arasyndaǵy dostyq qarym-qatynastyń aıasynda ilgerilep keledi, – dedi Qazaqstan Prezıdenti.
D.Sang Nursultan Nazarbaevqa kórsetken qonaqjaılyǵy úshin alǵys aıtyp, buǵan deıingi ótken kelissózderdiń tabysty bolǵanyn atap ótti.
– Qazaqstan men Qytaı arasyndaǵy berik seriktestik baılanystar yntymaqtastyǵymyzdyń negizi bolyp sanalady. Delegasııamyzdyń quramynda 20-ǵa jýyq isker top ókili bar. Biz Qazaqstan tarapymen jemisti kelissózder júrgizip, onyń barysynda talqylanǵan kún tártibindegi barlyq máseleler jóninde ózara túsinistikke qol jetkize bildik, – dedi D.Sang.
Budan bólek, Gonkongtyń qarjy mınıstri Nazarbaev ýnıversıtetiniń stýdentterimen áńgimelesýden zor áser alǵanyn atap ótti.
Sońynda Elbasy Nursultan Nazarbaev pen D.Sang Qazaqstan men Gonkongtyń odan ári yntymaqtastyǵy tabysty bolatynyna senim bildirdi.
Egemen-aqparat