Astananyń «Barys» hokkeı komandasy 14 qyrkúıek kúni Qurlyqtyq hokkeı lıgasy turaqty chempıonatynyń Ekaterınbýrgte jergilikti «Avtomobılıspen» ótken oıynynda býllıt serııasy boıynsha utylyp qaldy. Kezdesý 3:2 esebimen alań ıeleriniń paıdasyna sheshildi.
Matchtaǵy birinshi shaıba 14-mınýtta soǵyldy. Bul kezde bir artyq oıynshysy bolǵanyn jaqsy paıdalana bilgen «Avtomobılıst» alǵa shyqty. Goldy cheh shabýylshysy Petr Koýkal óz esebine jazdy. Ekaterınbýrgtikter 32-mınýtta Nıkola Tımashevtiń kúsh salýymen esepti ulǵaıtty. Al úshinshi kezeńde aıdyndaǵy ahýal kúrt ózgerdi. «Barys» oıynshylary 10 mınýttyń ishinde eki shaıba salyp, tarazy basyn teńestirip ketti. Aldymen 41-mınýtta komanda kapıtany Brendon Bochenskı mergendik tanytsa, 51-mınýtta Ilıa Lobanov kózge tústi. Esep – 2:2!
Overtaımda da osy esep ózgermedi. Sosyn býllıtter serııasyna kezek keldi. Onda Roman Starchenko men Ilıa Lobanov óz múmkindikterin bosqa jiberdi. Al alań ıeleri sapynan Petr Koýkal jeńis shaıbasyn soqty.
Osymen «Barys» bıylǵy maýsym bastalǵaly ótkizgen 6 oıynynyń 5-inde jeńilis taýyp otyr. Ol endi aldaǵy 3 matchyn Astanada ótkizedi.
Damır QOJAMQUL