Osydan tórt aı buryn Jambyl oblystyq densaýlyq saqtaý basqarmasynyń basshysy E.Masalımov jáne onyń eki orynbasary, sondaı-aq, memlekettik satyp alý, ekonomıka jáne bıýdjettik josparlaý bólimderiniń jetekshileri para aldy degen kúdikpen ustalǵan bolatyn. Sol kezde Sybaılas jemqorlyqqa qarsy is-qımyl ulttyq bıýrosynyń oblystyq departamenti bul laýazymdy tulǵalardyń aımaqtaǵy medısınalyq mekemelerdiń bas dárigerlerinen 300 ben 10 000 dollar kóleminde para alǵandaryn jarııalaǵan edi. Sondaı-aq, olar qyzmettik ókilettikterin teris paıdalana otyryp, dári-dármek jáne medısınalyq jabdyqtardyń tenderlerin ótkizýde zańsyz áreketterge barǵan.
Jýyqta №2 Taraz qalalyq soty Jambyl oblystyq densaýlyq saqtaý basqarmasynyń burynǵy basshysy E.Masalımovke úkim shyǵardy. Is materıaldaryna qaraǵanda, Masalımov óziniń qyzmettik ókilettigin paıdalana otyryp, osy basqarmaǵa qarasty emdeý mekemeleri basshylarynan birneshe márte para alǵan. Mysaly, qalalyq perınataldyq ortalyqtyń bas dárigeri óz bastyǵy Masalımovke baryp, sapaly medısınalyq qyzmet kórsetý úshin jyljymaly rentgen apparatyn berýdi ótinipti. Basqarma basshysy oǵan «jolyn jasaýdy» aıtqan. Aqyrynda bas dáriger oǵan 150 myń teńge para bergennen keıin bul másele oń sheshilipti.
Sot E.Masalımovti Qylmystyq kodekstiń 361 jáne 366-baptary boıynsha kináli dep taýyp, qyzmettik ókilettigin teris paıdalanyp, para alǵany úshin oǵan 10 mln 800 myń teńge kóleminde aıyppul saldy. Jáne múlki tárkilenip, ómir boıyna memlekettik qyzmette jumys isteýine tyıym salyndy.
Oralhan DÁÝIT,
«Egemen Qazaqstan»
Jambyl oblysy