Qazaqstan Respýblıkasynyń Syrtqy ister mınıstri Erlan Ydyrysov Astanadaǵy EKSPO-2017 kórmesine daıyndyq barysyn ınspeksııalaý úshin kelgen Halyqaralyq kórmeler bıýrosynyń bas hatshysy Vısente Lossertalespen kezdesti.
Kezdesý barysynda E.Ydyrysov kórmege halyqaralyq qatysýshylardy tartý boıynsha jumystyń nátıjeleri týraly aıtty. Búginde 103 memleket pen 17 halyqaralyq uıym EKSPO-2017 kórmesine ózderiniń qatysatyndaryn rastady, ulttyq seksııalardyń 92 komıssary taǵaıyndaldy, shet eldermen 71 qatysý sharttaryna qol qoıyldy, dedi E.Ydyrysov.
Taraptar kórmege qatysýshy elderdiń ulttyq kúnderin ótkizýge daıyndyq sheńberinde júrgizilgen tabysty jumysty atap ótti. Qazirgi tańda osyndaı is-sharalardy uıymdastyrýǵa 61 ótinim kelip túsken.
E.Ydyrysov EKSPO-2017 kórmesiniń sheteldik qonaqtary úshin qolaıly jaǵdaılar jasaý maqsatynda Qazaqstan shet eldermen vızasyz rejim qalyptastyrý jumysyn jandandyrýda ekenin atap ótti. Qazirgi tańda Qazaqstanǵa 20 damyǵan eldiń azamattary vızasyz kele alady, al 2017 jyldyń basynan bastap Ekonomıkalyq yntymaqtastyq jáne damý uıymyna múshe barlyq memleketterdiń, sondaı-aq Malaızııa, Monako, Birikken Arab Ámirlikteri men Sıngapýr azamattary úshin (30 kúnge deıin) vızasyz rejim kúshine enedi, dedi Syrtqy ister mınıstri.
EKSPO-2017 kórmesine qatysýshy elderdi tartý boıynsha jumys barysyn joǵary baǵalaı kele, V.Lossertales Qazaqstan Úkimeti men Halyqaralyq kórmeler bıýrosynyń arasynda qol qoıylǵan jeńildikter men artyqshylyqtar týraly kelisimniń asa mańyzdy ekenin atap atap ótti.
Kezdesý qorytyndysy boıynsha taraptar Astanadaǵy EKSPO-2017 kórmesin sátti ótkizý maqsatynda tyǵyz baılanystardy jalǵastyrýǵa ýaǵdalasty.
«Egemen-aqparat»