Aldaǵy jyly Almaty qalasynda bastalatyn XXVIII Qysqy Ýnıversıadanyń dúbiri jaqyndap qaldy. Al stýdentterdiń sporttyq jarystary ótetin nysandardaǵy ázirlik jumystarynyń der kezinde aıaqtalýy jiti nazarda tur.
Almatyda Qysqy Ýnıversıadanyń daıyndyǵyn pysyqtaýǵa arnalǵan basqosý ótip, oǵan halyqaralyq stýdenttik sport federasııasynyń prezıdenti Oleg Matysın bastaǵan delegasııa arnaıy keldi. Jıynda Qysqy Ýnıversıadaǵa qatysýǵa ótinim bergen elderdiń ókilderi Almaty qalasynyń ákimi, XXVIII Qysqy Ýnıversıadany uıymdastyrý jónindegi komıssııa tóraǵasynyń orynbasary Baýyrjan Baıbektiń esebin tyńdap, atqarylǵan jumystarǵa baǵa berdi.
Qala ákimi habardar etkendeı, qazirdiń ózinde paıdalanýǵa beriletin jańa ǵımarattar men kúrdeli jóndeý júrgizilip jatqan oryndardaǵy jumystar aıaqtalýǵa jaqyn. Nysandar belgilengen merzimnen 2 aıdaı ýaqyt buryn tapsyrylmaqshy eken.
– Ýnıversıadanyń alaýy tutanatyn sátke sanaýly ǵana ýaqyt qaldy. Bul jarys Almatynyń ǵana emes, tutas Qazaqstannyń abyroıyn asqaqtatatyn doda. Sondyqtan da, jarys ótetin nysandardyń daıyndyǵy men sharanyń minsiz uıymdastyrylýyna barymyzdy salyp kirisip jatyrmyz. Qazirge deıin negizgi nysandardyń qurylysy aıaqtalyp, qoldanysqa berýge daıyn. Qalamyzǵa sportshylarmen qatar, jarysty tamashalaýǵa myńdaǵan, júzdegen týrıst kelmekshi. Biz, ásirese, alys-jaqynnan keletin qonaqtardyń jeńisti sátterge kýá bolýymen qatar, Qazaq eliniń qonaqjaılylyǵyn sezinip, rıza bolyp qaıtýy úshin barlyq jaǵdaıdy jasaýǵa tıispiz. Jáne bul doda elimizdiń Táýelsizdigine 25 jyl tolýy jáne Almatynyń 1000 jyldyǵy sııaqty aıtýly merekelerdiń jańǵyryǵy ispetti, jalpaq jurtqa Qazaqstannyń sporttyq el ekenin taǵy da bir jarııa etedi dep senemiz, – dedi Baýyrjan Baıbek.
Almatyǵa arnaıy kelgen halyqaralyq stýdenttik sport federasııasynyń ókilderi úsh kún boıyna qaladaǵy nysandardy aralap, ǵımarattardyń Ýnıversıada ótkizý talaptaryna sáıkestigine kóz jetkizetin bolady.
Qalmahanbet MUQAMETQALI,
«Egemen Qazaqstan»