Kúndelikti qym-qýyt tirlikte asa baıqala bermese de, tapshylyǵyn turmys kótere almaıtyn, dereý orny bilinip qalatyn zattar bolady. Sonyń biri – kádimgi aına, shyny. Aınasyz búginde aınalany elestetý qıyn bolar. Shynynda da solaı. Úıdiń terezesinen bastap, shynynyń paıdalanylmaıtyn jeri kemde-kem. Tipti, qazir qurylysta da shynynyń orny ózekti bolyp tur. Qostanaı qalasyndaǵy «Steklosentr-2008» jaýapkershiligi shekteýli seriktestigi on bes jyldan beri tutynýshylar qajetin tabýǵa kómektesip, kóńilden shyǵyp keledi. Jyl saıyn olardyń kórseter qyzmet túrleri de, taýardyń ár alýandyǵy da kóbeıe túsken. Kompanııa tutynýshyǵa shyny túrleri men ony óńdep, formaǵa keltirip berýdiń túr-túrin usynady.
Aınanyń neshe túri, onyń aınalasyn árlendirý, jazý, oıýlaý sekildi turmysqa sándi buıymnyń barlyǵy «Steklosentr-2008» kásipornynyń Qostanaıdaǵy sehynan shyǵyp jatyr. Onyń dúkeninen tutynýshy tek aına ǵana emes, turmysta qoldanylatyn shynydan jasalǵan talaı buıymdy tabady, tańdaıdy. Ústel, oryndyq, as úıdiń qabyrǵasyn árleıtin «aljapqysh», saǵat deısiz be, shynydan jasalyp syńǵyrlap turǵan talaı dúnıege tap bolasyz. Munyń barlyǵyn jasaý kásiporyn mamandary men basshylaryna Italııadan aldyrylǵan qymbat jabdyqtyń arqasynda múmkin boldy. Kompıýterlendirilgen stanok belgilengen baǵdarlamamen áınektiń nemese aınanyń betine tyrnaq izindeı artyq syzatsyz qalaǵan sýretti, oıýdy salyp, jazýdy shytynatpaı jazyp beredi. Sondaı-aq, osy stanoktardyń birimen monolıtti shynyny syzatsyz qalaǵan kólemde, qalaǵan formada kesedi.
О́ndirisi ozyq elderden úırengende ǵana kásiptiń qadamy júretinin izdengen kásipkerler jaqsy bilip qalǵan. Italııadan ákelingen shyny kesetin, órnekteıtin jabdyqtardyń kepildigi bar. Eger baǵdarlamany ózgertý nemese jańa materıaldar kerek bolsa, kásiporyn mamandary ıtalııalyq zaýyttyń Máskeýdegi ókildigine habarlasady.
– Mysaly, jylyna eki ret Máskeýdegi zaýyt ókildigine shyǵyp otyramyz. О́ıtkeni, aına men shynylardy órnektegende olardyń astyna qalyń alıýmınıı taqta qoıylady. Onyń ústińgi qabatyn jarty jylda bir ret ózgertip turý kerek. Osyǵan máskeýlikter kómekke keledi, – deıdi «Steklosentr-2008» kásipornynyń mamany Pavel Aksenov.
Turmys ta, qurylys ta shynysyz bolmaıdy dedik. Sońǵy kezderi trıpleks, ıaǵnı «shyńdalǵan» shynyǵa naryqta suranys kóp. Onyń mánisi de, sapasy da qansha baltalasań da shynynyń jaryqshaqtary ushpaıtyndyǵynda, qaýipsizdiginde. Seh mamany osyndaı shynynyń bir bóligin baltalap kórsetti. Mundaı shyny túrin as úıdiń qabyrǵasyn árleýge qoldanady, sonymen qatar avtobýstardyń terezesine de osyndaı qaýipsiz shynylar salynady. Bul jaraqattyń bolýyn azaıtýǵa yqpal etedi. Qurylysta qazir iri ǵımarattardyń esik, terezesin de «shyńdalǵan» shynydan salý talap etiledi. Ol kádimgi shynynyń birneshe betin arasyna arnaıy plenka salyp qabattap, eki saǵat joǵary temperatýrada «pisirip» jasalady. Mundaı úlken suranysqa ıe taýardy jasaý úshin «Steklosentr-2008» kásipornyna taǵy da sheteldik jetildirilgen stanok kerek. Ony kásiporyn basshylyǵy «Damý-óndiris» baǵdarlamasy boıynsha alýǵa qajetti qujattar daıyndaý ústinde. Baǵasy 95 mıllıon teńge turatyn stanok Qostanaıda trıpleks shynysyn óndirýge múmkindik jasaıtyn bolady.
Jalpy, «Steklosentr-2008» jaýapkershiligi shekteýli seriktestigi memlekettik baǵdarlamanyń arqasynda tutynýshy qajetin óteıtin kásiporyn dárejesine kóterildi, naryqty baıytty. Shaǵyn jáne orta kásipkerlikti qoldaý jónindegi «Damý» qorynyń baǵdarlamasy boıynsha 49 mıllıon teńgeni jylyna 6 paıyzdyq ústememen alǵan bolatyn. Sonyń arqasynda ásem buıymdar óndirip, tutynýshylar kóńilinen shyǵyp, naryqta ózin senimdi sezine bildi. Endi olar kásiporyndy keńeıtýdi josparlap otyr.
– Memlekettik baǵdarlamanyń qoldaýy bizdiń kásiporynnyń naryqqa kelýine tolyq múmkindik jasady. Átteń, Qazaqstanda shyny óndiretin óndiris joq. Biz shynyny Reseı men Qyrǵyzstannan tasımyz. Qyrǵyzstanda nemis ınvestorlary shyny zaýytyn salǵan, shynysynyń sapasy jaman emes. Biz óz shyny zaýytymyzdy salýdy armandaımyz, – deıdi Pavel Aksenov.
Áý basta jalǵa alǵan kishkentaı sehta tereze jeldetkishine shyny kesýmen aınalysqan derbes kásiporyn óziniń jeke ǵımaraty bolýyn, úlken kásiporynǵa aınalýdy maqsat tutqan edi. Mine, qazir 150 adamǵa jumys berip otyrǵan, Astana, Kókshetaý, Petropavl qalalarynda fılıaldary bar iri kásiporynǵa aınaldy. Kásiporynnyń shyny shyǵarar ýaqyty da keler.
Názıra JÁRIMBETOVA,
«Egemen Qazaqstan»
QOSTANAI