Almaty oblysynda is-saparmen júrgen Elbasy birqatar áleýmettik mańyzy bar nysandardy aralady. Bul týraly Egemen-aqparat Aqordanyń baspasóz qyzmetine silteme jasap habarlaıdy.
Elbasy «Nam G.N.» sharýa qojalyǵynda boldy
Memleket basshysy aýyl sharýashylyǵy daqyldaryn kútip-baptaýǵa mamandanǵan kásiporynnyń jumysymen tanysty.
Qazaqstan Prezıdentine oblystyń agroónerkásip kesheniniń negizgi kórsetkishteri jáne qant qyzylshasy óndirisin damytý úshin qabyldanyp jatqan sharalar týraly baıandaldy.
Nursultan Nazarbaev qazir aýyl sharýashylyǵyn memlekettik sýbsıdııalaýǵa degen kózqarastyń ózgergenin atap ótti.
– Meniń sharýalarǵa aıtyp júrgen oı-pikirimniń barlyǵynyń negizgi túıini – eńbek ónimdiligin sýbsıdııalaý qajettigi. Iаǵnı, qarajat eń aqyrǵy ónim óndirisi úshin bólinetin bolady, – dedi Memleket basshysy.
Budan bólek, Nursultan Nazarbaev óńdeý kásipornynyń agrarlyq tehnıkalary men aýyl sharýashylyǵy ónimderi kórmesin aralady.
Sońynda Elbasy óńirdiń sharýalarymen áńgimelesip, aldaǵy jumystaryna tabys tiledi. Budan keıin Prezıdent Tekeli taý-ken óńdeý kesheninde bolyp, kásiporynnyń jumysymen tanysty.
Taldyqorǵan qalasynyń kópsalaly aýrýhanasynda boldy
Qazaqstan Prezıdentine oblystyń densaýlyq saqtaý júıesin damytýdyń basty baǵyttary jáne tıisti memlekettik baǵdarlamalardyń iske asyrylý barysy týraly baıandaldy.
Sondaı-aq, Nursultan Nazarbaev aýrýhana qyzmetkerlerimen kezdesti. Olar júrgizilip jatqan áleýmettik saıasatqa qoldaý bildirip, densaýlyq saqtaý salasyna qamqorlyǵy úshin Elbasyǵa alǵystaryn aıtty. 300 adam sııatyn medısınalyq mekeme stasıonarlyq, stasıonardy almastyratyn jáne joǵary mamandandyrylǵan medısınalyq kómek kórsetedi. Kópsalaly aýrýhana jańa medısınalyq qurylǵylarmen jabdyqtalǵan.
Oqýshylar saraıynda boldy
Memleket basshysy bıologııa, fızıka kabınetterin, tehnıkalyq shyǵarmashylyq modelderi kórmesin, horeografııa zalyn, úlken konsert zalyn aralap kórip, kórkemóner galereıasyndaǵy sýretter ekspozısııasymen tanysty.
Elbasy nazaryna án jáne bı óneri boıynsha balalardyń konserttik nómirleri usynyldy.
Budan bólek, Nursultan Nazarbaev Oqýshylar saraıyna keletin balalarmen jáne olardyń ata-analarymen áńgimelesip, shyǵarmashylyq tabys pen baq-bereke tiledi.
Sońynda Memleket basshysy Oqýshylar saraıyna jaıly avtobýs tartý etti.
Ǵımarattyń jalpy alańy – 13 myń sharshy metrden astam. Mekeme ınfraqurylymy sheberhana, zerthana, kórme jáne májilis zaldaryn, sondaı-aq mýzeı, medıateka, dybys jazý stýdııasy men observatorııany qamtıdy.
Sonymen qatar Nursultan Nazarbaev Taldyqorǵan qalasynyń damý jobasymen tanysty. Taldyqorǵanda bıyl 12 kópqabatty turǵyn úı salynsa, aldaǵy jydy taǵy 14 úıdiń qurylysy bastalmaq. Sondaı-aq, bolashaqta qalada birneshe áleýmettik nysandar jáne 8, 9, 10 yqsham aýdandar turǵyzylady. Bul týraly Elbasyna qala ákimi Baǵdat Qarasaev áńgimeledi dep habarlady Taldyqorǵan qalasy ákiminiń baspasóz hatshysy Danııar Seısenbaev.