Abaıdyń «Jıdebaı-Bórili» memlekettik qoryq-mýzeıinde «Shyńǵystaý» sýret galereıasy ashyldy. Galereıa osy zerde ordasynda jınaqtalǵan týyndylar negizinde jurtshylyq nazaryna usynylyp otyr. Shyńǵystaý – qazaq halqynyń uly perzentteri Abaı Qunanbaıulynyń, Shákárim Qudaıberdiulynyń, Muhtar Áýezovtiń týǵan jeri. Eýrazııa qurlyǵynyń kindik tusy sanalatyn Shyńǵystaý ólkesinde úsh alyptyń dúnıege kelip, sóz ónerin ásemdik bıigine kóterýi – adamzat tarıhynda sırek kezdesetin qubylys. Mine, galereıada osynaý qasıetti Shyńǵystaý óńiriniń tabıǵaty men tarıhı jerleri Abaı qoryq-murajaıy qorynda jınaqtalǵan jergilikti qylqalam sheberleriniń týyndylary arqyly kórsetiledi. Sýret kórmesinde belgili óner ıeleri M.Álıakparov, M.Belıaev, Ǵ.Makarov, N.О́tepbaev T.Baıǵalıev, T.Tatıev jáne taǵy basqa sýretshilerdiń 100-den astam týyndylary qoıylǵan.
– Ásirese, halqymyzdyń sýret ónerindegi maqtanyshy Ábilhan Qasteevtiń jaýhar týyndylary Abaı mýzeıine kelýshilerdiń erekshe qyzýshylyǵyn týdyrady dep senemiz. Áıgili qylqalam sheberiniń mýzeı qorynda 12 týyndysy saqtalǵan bolsa, sonyń biri – «Jas Abaı» sýreti de kelýshilerdiń kózaıymyna aınaldy, – deıdi mýzeı ákimshiligi.
Sýret galereıasynyń bir ereksheligi – qylqalam sheberleriniń týyndylary mýzeıdegi Abaı ómiri men shyǵarmashylyǵyn pash etetin bólimderdiń mazmunyn tereńirek asha túsýge kómektesedi. Máselen, «Jaz» zalynyń mańdaı aldyndaǵy qylqalam sheberleriniń týyndylary Shyńǵystaý óńiriniń tabıǵatyn aldyńyzǵa jaıyp salsa, «Úsh qaınar bulaq» ekspozısııasyndaǵy sýretter uly aqyn shyǵarmalarynyń tereń tamyrlarymen úndesedi.
Dýman ANASh,
«Egemen Qazaqstan»
SEMEI