HII halyqaralyq «Eýrazııa» kınofestıvaliniń aıasynda jáne Almaty kınostýdııasynyń 75 jyldyǵyna oraı, elimizdiń áıgili kınematografısterine arnalǵan memorıaldyq taqtalar qatary ulttyq kıno ónerine eńbegi sińgen tórt talanttyń esimimen tolyqty.
«Qazaqfılm» kınostýdııasynyń Juldyzdar alleıasyna belgili kınorejısser, Memlekettik syılyqtyń laýreaty, táýelsiz «Tarlan» syılyǵynyń ıegeri Oraz Rymjanovtyń, belgili rejısser, KSRO Kınematografıster odaǵynyń músheleri Shárip Beısembaevtyń, Qanymbek Qasymbekovtiń jáne akter, Memlekettik syılyqtyń laýreaty Saǵı Áshimovtiń juldyz-taqtalary ornatyldy.
Alleıa aldynda ótken mıtıngke «Eýrazııa» halyqaralyq kınofestıvaliniń bas dırektory Rashıd Nuǵymanov, qazylar alqasynyń tóraǵasy, rejısser Valerıı Todorovskıı, «Qazaqfılm» kınostýdııasynyń basshylyq quramy, belgili rejısserler men akterler, jańa juldyzdardy ıelengen maıtalman óner ıeleriniń týystary men jaqyn dostary qatysty.
«Búgin – úlken mereke. О́z kezeńinde otandyq kınematografııanyń damýyna ólsheýsiz úles qosqan adamdardy ómir boıy este saqtap júrýimiz óte mańyzdy», dedi Saǵı Áshimovtiń ákesi, KSRO halyq artısi Asanáli Áshimov.
Juldyzdar alleıasyna barlyǵy 30 kıno qaıratkerdiń esimi jazylǵan. 2011 jyly VII halyqaralyq «Eýrazııa» kınofestıvali kezinde Sh.Aımanov atyndaǵy «Qazaqfılm» kınostýdııasynyń aýmaǵyna qazaq kınosynyń sańlaqtaryna arnalǵan Alleıa ashylyp, onda qazaq kınosynyń korıfeıleri – Sháken Aımanovqa, Sultan-Ahmet Qojyqovqa, Májıt Begalınge, Abdolla Qarsaqbaevqa, Seráli Qojamqulovqa, Qalıbek Qýanyshbaevqa, Ámına О́mirzaqovaǵa, Ánýar Moldabekovke, Ydyrys Noǵaıbaevqa, Nurmuhan Jantórınge, Kenenbaı Qojabekovke taqtalar ornatylǵan bolatyn.
Aıgúl AHANBAIQYZY,
«Egemen Qazaqstan»
ALMATY