Jasyratyny joq, qazir qaı eldi mekenge barsaq ta jol boıynda, turǵyn úıler arasynda shashylyp jatqan polıetılen qapshyqtardan kóz súrinedi. Tazalyq aılyǵynda nemese mektep oqýshylarynyń senbilikterinde arnaıy tazartylsa da 1 kún ótpeı jatyp polıetılen paketter taǵy kóbeıedi. Sebebi, halyq satyp alatyn barlyq zattaryn birrettik qoldanýǵa arnalǵan paketterge salyp alady. Eger Tarazdaǵy «Polıetılen-Agronyń» jumysy qarqyndy damysa, qorshaǵan ortamyz ybyrsyǵan paketterden birshama tazaryp qalar edi. Endeshe bul zaýyt qaldyqsyz ónim shyǵarýmen qatar ekologııalyq tazalyqqa da kóp úles qosyp júrgeni sózsiz.
О́tken jyly údemeli ındýstrııalyq-ınnovasııalyq baǵdarlamamen ashylǵan «Polıetılen-Agro» JShS ásirese baý-baqsha egetin sharýalardyń qajettiligin qamtyp otyr. Seriktestik shyǵaratyn taýar – plenkalar men polıetılen jip. Mundaǵy eni 10 metrlik plenkalar negizinen baý-baqshaǵa, ıaǵnı jylyjaılarǵa arnalyp shyǵarylady. Sonymen qatar, plenkalardy azyq-túlik óndirýshiler taǵamdardyń tazalyǵyn saqtaý úshin ónimdi qaptaýǵa paıdalanady. Sol sekildi polıetılen jipterin de kóbine aýylsharýashylyq baǵytyna qoldanady eken.
Eń bastysy, taza plenkalardy, azyq-túlik qaptamalaryn shyǵarǵanda qalatyn qaldyq ónimderdi qaıta óńdep, qurylysqa qajetti materıal daıyndaıdy. Iаǵnı, kólemdi shyǵarylatyn qońyrqaı tústi plenkalardy qurylysta syz ótkizbeıtin tósenish retinde qoldanady. Seriktestikte óndiris ornynan shyqqan qaldyqty paıdaǵa jaratý kózdelgen.
Seriktestik dırektory Nurpeıis Qaldybekovtiń aıtýynsha, eni 10 metrlik plenkany elimizde jalǵyz «Polıetılen-Agro» ǵana óndiredi eken.
– Jalpy, plenka shyǵaratyn óndiris oryndary kóp. Biraq bizdiń elde baý-baqshaǵa, qurylysqa qoldanýǵa yńǵaıly, kólemdi etip shyǵaratyn biz ǵana. Plenkanyń enin 10 metr etip shyǵaratyn qurylǵyny Qytaıdan ákeldik. Zaýytymyzdy kúlli álemge burynnan málim Jibek jolynyń, búgingi úlken kúre joldyń boıyna saldyq. Sebebi, bul jol talaı eldi jalǵap jatyr jáne ońtústik óńiriniń ortalyǵy sekildi. Iаǵnı, tutynýshylarǵa da ońtaıly bolýy qarastyrylǵan. Aýylsharýashylyq taýarlarynyń 80 paıyzy ońtústik aımaqta óndiriletindikten zaýytymyz osy aımaqqa salyndy. Jylyna 2000 tonnaǵa deıin ónim shyǵaramyz. Tutynýshylar tarapynan suranys ta jaqsy. Ásirese, ónimimizdiń 80 paıyzyn kórshi Ońtústik Qazaqstan oblysyndaǵy Saryaǵash aýdanynyń jylyjaı salýshylary men baqsha daqyldaryn ósirýshiler alady. Qajetti shıkizatty shetelderden ákelemiz. Aldymen taǵamdar qaptamasyna, aýylsharýashylyq baǵytyna qajetti taza, óte kólemdi plenkalardy shyǵaramyz. Odan shyqqan qaldyqtardy qaıta óńdep, polıetılen jibin óndiremiz. Sol jipterden qońyrqaı tústi plenkalar shyǵarylady. Ony jol salǵanda, ǵımarat turǵyzǵanda astyna tóseýge qoldanady, – deıdi Nurpeıis Qaldybekov.
Qazir 15 adamdy jumyspen qamtyp otyrǵan seriktestik jumys qarqynyn báseńdetpeı, aldaǵy ýaqytta óndiristi ary qaraı damytýdy josparlap otyr.
Oralhan DÁÝIT,
«Egemen Qazaqstan»
Jambyl oblysy
Sýretti túsirgen
Altynbek QARTABAI