«О́KM operatory» JShS 21 qarashadan bastap Qazaqstannyń 17 qalasynda ótemaqy tóleı otyryp, eski kólikterdi qabyldaı bastaıdy. Bul týraly búgin atalǵan kompanııanyń basqarýshy dırektory Rústem Temirbek málim etti, dep habarlaıdy QazAqparat.
«Barlyq jaıtty Energetıka mınıstrligimen naqty keliskennen keıin biz bul baǵdarlamany iske qosamyz. Jalpy, biz 21 qarashadan bastap ony iske qosýǵa ázirmiz», - dedi ol.
Onyń aıtýynsha, baǵdarlamany júzege asyrý barysynda 10 myń eski kólik joıýǵa qabyldanady dep kútilýde. Joıýǵa tapsyrylatyn kólikter eki sanat boıynsha qabyldanady. Tolyq jınaqta eski kóligin tapsyrǵandar 150 myń teńge alsa, kólik shanaǵy, esigi, qozǵaltqyshy berilis qoraby mindetti túrde bar, biraq júrmeıtin kólikterge 48 myń teńge beriledi. Jobany iske asyrý úshin 2016 jyly «О́KM Operatory» JShS-yna bólingen jalpy aqsha somasy - 1 mıllıard 250 myń teńge.
Baǵdarlamaǵa qatysatyn jeke tulǵalarǵa mynadaı qujattar qajet: baǵdarlamaǵa qatysý týraly ótinish (onda TAÁ, SIN, BIK jáne esepshot nómiri mindetti túrde kórsetilýi tıis), eski kólikti joıýǵa tapsyrý úshin IIM organynan tirkeýden shyǵarý týraly anyqtama, ótinish berýshiniń senimhaty (kólik ıesi bolmaǵan jaǵdaıda), kólik ıesiniń nemese senim bildirgen adamnyń jeke kýáligi, esepshot jónindegi anyqtama, tozyǵy jetken eski kólikti joıýǵa tapsyrý týraly kelisim.
Al eski kólikti joıýǵa tapsyratyn zańdy tulǵalary jáne onyń atynan áreket etetin senimdi tulǵa memlekettik tirkeýde turǵandyǵy jóninde qosymsha anyqtama daıyndaýy kerek.