Qazaqstanda jelilik basylym retinde tirkelgen blogerler buqaralyq aqparat quraldary paıdalanatyn quqyqqa ıe bolýy múmkin.
Bul týraly QR Aqparat jáne kommýnıkasııalar vıse-mınıstri Alan Ájibaev málim etti, dep habarlaıdy QazAqparat.
«Mınıstrlik aqparattyq alańda resmı usynylmaǵandarǵa qajetti sharttar jasaý qajettigin túsinedi. Buǵan qosa, blogerler bizdiń elimizde oryn alyp jatqan qandaı da bir oqıǵalardy belsendi jazyp kórsetýde. Sondyqtan da olar úshin erikti túrde jelilik basylym retinde tirkelý múmkinshiligi qarastyrylady. Bul zańnamalyq negizde buqaralyq aqparat quraldary quqyǵyn alýǵa jaqsy múmkinshilik», - dedi ol Aqparat jáne kommýnıkasııalar mınıstrliginiń alqa otyrysynda.
Onyń aıtýynsha, sheteldik BAQ-qa aqparattyq materıaldar usynatyn el azamattaryn tirkeý týraly usynys ta dál osy maqsattardy kózdeıdi.
«Árıne, alda túrli formatta jáne quramda qujatty talqylaý bar. Qazir bul normalardy tikeleı zerdelep, talqylaıtyn jumys toby qurylýda. Qazirdiń ózinde aıtylyp jatqan usynystar men eskertpeler bizdiń tarabymyzdan qaperge alynyp, zań jobasyn ázirleý barysynda eskeriletin bolady», - dedi Ájibaev.
Aıta keteıik, QR Aqparat jáne kommýnıkasııalar mınıstri Dáýren Abaev zań jobasyn qoǵamdyq talqylaýdan ótkennen keıin 2017 jyldyń naýryzyna deıin Úkimetke jáne 2017 jyldyń birinshi jartyjyldyǵynda Parlament Májilisine engizý qajettigin aıtqan bolatyn.