Taıaýda Jezqazǵan qalasynda Táýelsizdiktiń 25 jyldyǵy sheńberinde «Táýelsizdik – tumarym, Máńgilik El – turaǵym» atty merekelik is-shara bolyp ótti. Bul aýqymdy sharany uıymdastyrǵan – Qaraǵandy oblysynyń Jastar saıasaty máseleleri jónindegi basqarmasy, Jezqazǵan qalasynyń ákimdigi, Jezqazǵan Bıznes jáne kólik kolledji.
Bıznes jáne kólik kolledjinde ótken sharanyń resmı ashylý saltanatynan soń, burynyraq jarııalanǵan, Baýbek Bulqyshev pen Muqan Imanjanovqa arnalǵan aqyndar músháırasynyń qorytyndysy habarlandy. Qazylar alqasynyń sheshimimen birinshi oryndy jezqazǵandyq aqyn Dáýrenbek Bulanbaev ıelense, ekinshi-úshinshi oryndardy, tıisinshe qaraǵandylyq Erbolat Qýatbekov pen Qaırat Imanbekov enshilep, qarjylaı syılyqtardy qanjyǵalaryna baılady. Sonymen qatar, Janat Ábdiǵojın, Maqsat Kúzemhanov, Abaı Oraz, Ásel Dúısembaeva, Aqnur Nurǵazıeva syndy jas aqyndar da Alǵys hattarmen, aqshalaı syılyqtarmen marapattaldy. Sońynan Jezqazǵandaǵy Ahmet ıshan Orazaıuly atyndaǵy meshittiń bas ımamy Mádı Smaǵulov arýaqtarǵa baǵyshtap quran oqydy.
Budan keıin osy kolledjde kópten kókeıde júrgen ıgi maqsat júzege asty. Oqý ornynda óskeleń urpaq tárbıesimen, qoǵamdyq sharalarmen aınalysatyn «Serpin» jastar ortalyǵy ashyldy. Ortalyqtyń stýdentterge arnalǵan óz ashanasy, baspahanasy, turmystyq qyzmet kórsetý orny bar. Budan bólek, munda monsha jumys isteıdi, jazǵy tennıs korty da osynda.
Oblystyń jastar saıasaty máseleleri jónindegi basqarmasynyń basshysy Mıras Quttybaı men Astana, Qaraǵandy qalalarynan kelgen óner tulǵalary Jezqazǵan qalasynyń belsendi stýdent jastarymen kezdesip, keleli máselelerdi ortaǵa saldy. Al «Nur Otan» partııasy Qaraǵandy oblystyq fılıalynyń janyndaǵy «Jas Otan» jastar qanatynyń tóraǵasy Nurjan Jetpisbaev stýdentterge arnap «Kóshbasshylyq qasıetterdi damytý» taqyrybynda semınar-trenıng ótkizdi.
Besin aýa sharaǵa qatysýshylar Jezqazǵan qalasyndaǵy Halyqtar dostyǵy jáne mádenıet úıinde Astana men Qaraǵandy ónerpazdarynyń, Jezqazǵan qalalyq fılarmonııasynyń, «Aq ájeler», «Jar-jar shoý» ansamblderiniń, basqa da jergilikti ánshi-bıshilerdiń qatysýymen ótken «Táýelsizdik – tuǵyrym!» atty konserttik baǵdarlamany tamashalady.
Keshkisin shara qonaqtaryn Jezqazǵan qalasynyń ákimdigi qoshemetpen qabyldap, ıgi lebizderin bildirdi.
Al ekinshi kúni shaǵyn fýtboldan óner adamdary arasyndaǵy dástúrli VI «Qasym» kýbogyna kezek berildi. Nátıjesinde, Jezqazǵannyń «Mádenıet maıtalmandary» jáne «Ulytaý» komandalary birinshi, ekinshi oryndarǵa taban tirese, qaraǵandylyq «Arqa» komandasy úshinshi orynnan kórindi.
Qoǵamdyq bastamalarǵa, ásirese rýhanı sharalarǵa eleńdep otyratyn Jezqazǵan jurty bir serpilip qaldy.
Qaırat ÁBILDINOV,
«Egemen Qazaqstan»
Qaraǵandy oblysy