Atyraýda memleket jáne qoǵam qaıratkeri, halyq jazýshysy, Memlekettik syılyqtyń ıegeri, Eńbek Eri Ábish Kekilbaevty eske alýǵa arnalǵan «Kemel eldiń kemeńger qalamgeri» atty ádebı-óner keshi boldy. Oǵan Astana men Almatydan, Batys Qazaqstan men Mańǵystaý oblystarynan qatysýǵa kelgen qonaqtardyń arasynda kemeńger tulǵanyń jary Klara Jumabaeva, uly Dáýlet pen qyzy Sáýlet, memleket jáne qoǵam qaıratkerleri О́mirbek Báıgeldi, Kenjeǵalı Saǵadıev, Zeınolla Alshymbaev, Baqtyqoja Izmuhambetov, О́mirzaq Ozǵanbaev, Májilis depýtaty Abaı Tasbolatov, jazýshylar men aqyndar Qajyǵalı Muhambetqalıev, Rollan Seısenbaev, О́tegen Oralbaev, Aqushtap Baqtygereeva, Mereke Qulkenov, «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli, jelmen jarysqan jelaıaq, ardager sportshy Ámın Tuıaqov, kúıshi Serjan Shákratov, jyrshy-termeshi Amandyq Kómekov, ánshi Tamara Asar bar.
Elimizdiń ár óńirinen Jaıyq jaǵasyna kelgen qonaqtar aldymen H.Dosmuhamedov atyndaǵy Atyraý memlekettik ýnıversıtetinde halyq jazýshysy Ábish Kekilbaevtyń ádebı murasyn ǵylymı zertteý ortalyǵynyń ashylýyna qatysty. Ortalyqtyń lentasyn qalamgerdiń jary Klara Jumabaeva men Atyraý oblysynyń ákimi Nurlan Noǵaev qıdy.
Ortalyqta jazýshynyń ádebı týyndylary qoıylǵan. Budan keıin «Kemel eldiń kemeńger qalamgeri» atty ádebı-keshinde estelik aıtýshylar Ábish Kekilbaevtyń qalamgerlik jáne kemeńgerlik qyrlaryna keńinen toqtaldy. Aldymen sóz alǵan oblys ákimi N.Noǵaev jazýshynyń «Rýhtyń kúshtiligi – ardyń tazalyǵy, sezimniń shynaıylyǵy» degen sózin mysalǵa ala otyryp, el táýelsizdiginiń qalyptasý kezeńindegi kósemdik, kemeńgerlik bolmysyn tanytqanyna toqtaldy.
Kenjeǵalı Saǵadıevtyń pikirinshe, ol ult perzenti retinde qazaq halqynyń rýhanı damýyna aıshyqty qoltańbasyn qaldyrdy. Al óner zertteýshisi, kompozıtor Ilıa Jaqanov «Jazýshynyń sýretkerlik bolmysy zerttelýi qajet» deı kele sheshendik qabiletine birneshe mysaldar keltirdi.
Tanymal jazýshylar Qajyǵalı Muhambetqalıev, Aqushtap Baqtygereeva, Mereke Qulkenov, memleket jáne qoǵam qaıratkerleri О́mirbek Báıgeldi, Baqtyqoja Izmuhambetov, Zeınolla Alshymbaev kemeńger qalamgerdiń adamı qasıetteri týraly tolǵana áńgimeledi.
«Ábish –uly sýretker, ol álemdegi eń tanymal 100 jazýshynyń tizimine endi» dedi jazýshy Rollan Seısenbaev.
Al «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli jazýshynyń pýblısıstıkasyna toqtaldy.
H.Dosmuhamedov atyndaǵy Atyraý ýnıversıtetiniń stýdentteri qalamger shyǵarmalarynan úzindiler oqydy. Ádebı-óner keshi barysynda án aıtyldy, kúı tartyldy.Sonymen birge, Ábish Kekilbaev atyndaǵy shákirtaqy alǵashqy ıegerine tapsyryldy.
Joldasbek Shópeǵul, Atyraý