Búgingi tańda páter ıeleri úshin energııa únemdeý men zamanaýı ınnovasııalyq tehnologııalardy kúndelikti qoldanysqa engizýdiń mańyzy zor. EKSPO-2017 kórmesin elimizde ótkizýdegi maqsattyń biri osy ekeni belgili. Elbasy bastamasymen júzege asyrylyp jatqan «Nurly jol» ınfraqurylymdy damytý baǵdarlamasynda ony júzege asyrý tetikteri jan-jaqty kórsetilgen.
Osyǵan oraı, Ulttyq ekonomıka mınıstrligi Qurylys jáne turǵyn úı-kommýnaldyq sharýashylyq isteri komıtetiniń bastamasymen «Turǵyn úı-kommýnaldyq sharýashylyǵyn basqarýdyń tıimdi ádisterin qoldaný, ınnovasııa men energııa únemdeý tehnologııalaryn engizý negizinde damytý» atty aımaqtyq konferensııalar ótpek. Qazan aıynyń 28-i kúni Astanada, al 4 qarashada Aqtóbe qalasynda ótetin alqaly jıynǵa qala jáne oblys basshylary, sonymen qatar, turǵyn úı ınspeksııalarynyń, PIK qaýymdastyqtarynyń, halyqaralyq jobalardyń, ǵylymı jáne bilim berý mekemeleriniń jetekshileri men mamandary qatysady dep kútilýde.
Qatysýshylar О́ńirlerdi damytýdyń 2020 jylǵa deıingi baǵdarlamasy oryndalýynyń barysy jaıynda, turǵyn úı qatynastaryn damytý, kópqabatty turǵyn úılerge kúrdeli jóndeý jumystaryn júrgizý men uıymdastyrýdy ońtaılandyrý, basqarýshy jáne qyzmet kórsetýshi kompanııalardyń qyzmeti týraly birqatar máselelerdi talqylap, paıymdy pikirlerimen bólisedi.
Aımaqtyq konferensııalardyń jumysyna qatysýǵa múddeli kompanııalar atalǵan sharanyń uıymdastyrýshysy – Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵyna habarlasa alady.
Nurlybek Dosybaı,
«Egemen Qazaqstan»