Jyl basynan beri Qazaqstanda ınternette ornalastyrylǵan 20 myńnan astam ártúrli taqyryptardaǵy beıádep materıal buǵattalǵan. Mundaı derek Aqparat jáne kommýnıkasııalar mınıstrliginiń uıymdastyrýymen ótken alqada aıtyldy.
«16 jasqa tolmaǵandardyń áleýmettik jelilerde tirkelýine shekteý engizý» taqyryby aıasynda uıymdastyrylǵan otyrysqa memlekettik organdar men túrli uıymdar jáne qoǵam belsendileri qatysqan bolatyn. Atalǵan mınıstrliktiń memlekettik mekeme retinde ınternet pen áleýmettik jelilerdiń muqııat baqylanatyndyǵyn baıandaǵan Janat Muratuly paıdasynan zııany kóp saıttardy bylaı qoıyp, sonymen mándes málimetter de buǵattalatyndyǵyn aıtty.
«Árıne, biz paıdasynan zııany kóp saıttardy quzyrly organdarmen birlese otyryp, qyzmetin toqtatamyz. Odan bólek, jetkinshekter kóp úıirsekteıtin áleýmettik jelilerdi de qatań qadaǵalap, saraptap otyramyz. Jyl basynan beri 20 myńnan astam materıaldy buǵattadyq. Onyń basym bóligi balalardy óz-ózine qol jumsaýǵa jeteleıtin, pornografııalyq sıpatqa ıe nemese teris aǵymǵa úndeıtin, tipti, buzaqylyq áreketter arqyly qatygezdikke baýlıtyn baǵytta bolǵandyqtan osyndaı sheshim qabyldadyq», – dedi ol.
Sondaı-aq, jıynda máseleniń ózektiligi men áleýmettik mańyzdylyǵyna baılanysty balalardy ınternettiń qaýip-qaterinen qorǵaý úshin tehnıkalyq múmkindikter arqyly qoıylatyn shekteýler týraly da usynystar aıtyldy.
Sonyń biri – baılanys operatorlary «balalar ınterneti» dep atalatyn qyzmetti iske qosýy týraly boldy.
«Bálkim, baılanys operatorlarymen birlese otyryp jetkinshekterge arnalǵan shekteýli «balalar ınterneti» qyzmetin iske qosý kerek shyǵar. Bul ózi keıbir elderdiń tájirıbesinde bar. Belgili bir deńgeıde ınternettiń tarıfin engizip, ózgesine shekteý qoıylýy qajet. Onyń ereksheligi sol – balalarǵa usynylǵan ınternette zııandy kontentti buǵattaý mindetteletin bolady», – dedi J.Qojahmetov.
Nurlybek DOSYBAI,
«Egemen Qazaqstan»