Budan shırek ǵasyr buryn irgetasy qalanyp, ashylýyna Memleket basshysy Nursultan Nazarbaev qatysqan №7 qalalyq klınıkalyq aýrýhana tek Almaty qalasynda ǵana emes, elimizdegi asa iri kópbeıindi emdeý orny. El ekonomıkasynyń eń aýyr kezeńinde densaýlyq kúzetinde halyq ıgiligine qyzmet kórsetip, Táýelsizdigimizdiń tuǵyrly, baıandy bolýyna at salysyp kele jatqan bul klınıka qıyn jyldardy da eńserdi, qanshama tolaǵaı tabystarǵa da qol jetkizdi. Sonyń negizinde 25 jylda alyp shaharda bilikti mamandar shoǵyrlanǵan aýrýhana medısınalyq kómekke muqtaj, janyna shıpa izdegen jandarǵa kúndiz-túni kómek kórsetti. Jýyrda atalmysh aýrýhana qos mereıtoıdy Alataý shıpajaıynda saltanatty jaǵdaıda atap ótti.
Iá, búginde halyq aýzynda «Jetinshi aýrýhana» dep atalyp ketken bul emdeý orny 1000 tósek-orynǵa eseptelip salynǵan edi. Qyzmetkerler jaǵynan da, kelýshi pasıentterdiń sany jaǵynan da elimizdegi asa iri medısınalyq ortalyq sanalady. Qazirgi tańda emdeý ornynda 1359 qyzmetker, onyń 255-i dáriger, olardyń 4-i medısına ǵylymynyń doktory, 14-i ǵylym kandıdaty, eńbek etedi, sonymen birge, myńǵa tarta orta býyn medısına qyzmetkerleri kún-tún demeı qajymaı, talmaı qala men respýblıka aımaqtarynan kelgen emdelýshilerge arnaıy jáne joǵary mamandandyrylǵan medısınalyq qyzmet kórsetedi. Jylyna 70 myńnan astam naýqas qaralyp, onyń 20 myńnan astamy stasıonarda emdelip, kúrdeliligi ártúrli deńgeıdegi 11 myńnan astam ota jasalady.
Saltanatty jıyndy Almaty qalasy densaýlyq saqtaý basqarmasy basshysynyń orynbasary Baǵdagúl Ábdirásilova ashyp, aldymen Densaýlyq saqtaý jáne áleýmettik damý mınıstri Tamara Dúısenovanyń, qala ákimi Baýyrjan Baıbektiń quttyqtaýlaryn jetkizip, klınıka ujymynyń qalamyzda ǵana emes, respýblıka deńgeıinde tanylyp, kásibı biliktiligi jaǵynan kósh bastap kele jatqanyn maqtanyshpen ekpin túsire aıtty.
– Eger bizdiń aýrýhanany adam jasymen esepter bolsaq, onda bul qos mereıtoıǵa klınıkamyz qalyptasqan tulǵa retinde kelip otyr, – dedi odan keıin sóz alǵan atalǵan mekemeniń bas dárigeri Ánýar Amanov.
Klınıka eń sońǵy zamanaýı tehnologııalarmen jaraqtanǵan. Árıne, barlyq istiń bastamashysy bilikti kásibı maman. Klınıka mamandary joǵary kásibıligimen erekshelenip, bilimderin turaqty jetildirýdiń nátıjesinde jańa em túrlerin, sondaı-aq joǵary tehnologııaly emdeý ádisterin engizip otyrady. Máselen, joǵary tehnologııalyq qondyrǵymen jabdyqtalǵan keńestik-dıagnostıkalyq ortalyqta 300-den astam taldaý júrgiziledi. Qatardaǵy qalalyq klınıka bola tura 2012 jyldan aǵzalardy aýystyrýdy qolǵa aldy. Aǵzalar transplantasııasy jáne gepatopankreatobılıarlyq hırýrgııa ortalyǵynyń mamandary árbir naýqasqa ómirge degen qushtarlyq pen úmit syılaýda. Neıroınsýlt, bes bólimsheden turatyn neırohırýrgııa ortalyqtary men bıyl jańadan ashylǵan ortohırýrgııa jáne travmatologııa, endovaskýlıarlyq jáne ıntervensııalyq hırýrgııa bólimshelerinde zamanaýı emdeý tásilderi júrgiziledi. Al jańa «jasandy búırek» apparaty – gemodıalızdik em-shara halyqaralyq gemodıalız standartyna sáıkes keledi. Onda pasıenttiń ahýaly yjdaǵatty baqylanady. Qannyń parametrlerine dál monıtorıng júrgizilip, materıaldardy aralastyrý elektronıka men apparat ishindegi naqty baqylaýymen júzege asyrylady. Sondaı-aq, endokrınologııa, gematologııa, nefrologııa bólimsheleri de ońtústik astana úshin biregeı bólimsheler bolyp sanalsa, nevropatologııa, ýrologııa men gınekologııa bólimshelerinde kúrdeli deńgeıdegi otalar jasalady. Mamandardyń bilim deńgeıin, kásibı biliktiligin arttyrý klınıka basshylyǵynyń únemi baqylaýynda.
Sýrette: Baǵdagúl Ábdirásilova bilikti mamandardy marapattaýda