Ústimizdegi jyldyń 19 qazanynda О́zbekstan men Qyrǵyzstannyń syrtqy saıasat vedomstvolarynyń ókilderi 2016-2017 jyldarǵa arnalǵan yntymaqtastyq týraly baǵdarlamaǵa qol qoıdy. Qol qoıý rásimi Qyrǵyz Respýblıkasynyń Syrtqy ister mınıstri Erlan Abdyldaevtyń О́zbekstan Respýblıkasyna jumys saparynyń aıasynda júzege asty.
Eki kórshi el arasyndaǵy qarym-qatynasta aıtarlyqtaı jylymyq bastalǵaly asa kóp ýaqyt bola qoıǵan joq. Sarapshylar muny О́zbekstan prezıdentiniń mindetin atqarýshy Shavkat Mırzıeevtiń jańa baǵytymen baılanystyrady. О́zbek basshylyǵy Qyrǵyzstan azamattarynyń О́zbekstanǵa kirý jáne odan shyǵý rejimin jeńildetý jaǵyna qaraı qaıta qaraýy yqtımal degen de aqparat estilgen edi.
Ekijaqty qarym-qatynasty jaqsartý jaǵyna qaraı naqty qadam Qyrǵyz Respýblıkasynyń vıse-premeri Muhammetkalyı Abýlǵazıev bastaǵan aýqymdy delegasııanyń dostyq saparynan bastaý alǵan-tyn. Sol kezde, osy qazan aıynyń basynda О́zbekstannyń Ándijan oblysyna quramyna memlekettik organdardyń, jergilikti ózin ózi basqarý organdarynyń qyzmetkerleri, mádenıet qaıratkerleri men jastar ókilderiniń kóshbasshylary engen 130 adamdyq delegasııa barǵan edi. Olardyń arasynda Osh, Batken jáne Jalal-Abad oblystary ókimetteriniń ókiletti ókilderi bar bolatyn.
Taraptar birqatar kezdesýdiń qorytyndylary boıynsha dostyq ráýishte ekijaqty qarym-qatynas pen ári qaraıǵy ózara is-qımyldyń perspektıvalaryn talqylady. Eki eldiń buqaralyq aqparat quraldary atalǵan oqıǵany tarıhı retinde sıpattap, Tashkent pen Bishkek arasyndaǵy baılanystardy ári qaraı jaqsarta túsedi degen yńǵaıda úlken úmit artatyndaryn bildirdi.
Qyrǵyz-ózbek qarym-qatynasynyń qazirgi jaǵdaıy men perspektıvalary budan da joǵaryraq deńgeıde О́zbekstan Respýblıkasynyń Syrtqy ister mınıstri Abdýlazız Kamılovtiń Qyrǵyzstanǵa jumys sapary barysynda talqylandy. Sapar barysynda A.Kamılovti Qyrǵyz Respýblıkasynyń prezıdenti Almazbek Atambaev qabyldady. Buqaralyq aqparat quraldarynyń habarlaýlaryna qaraǵanda, taraptar eki jaqqa qatysty asa shetin máselelerdi, olardyń ishinde shekara, sý problemalary jáne taǵy basqa máselelerdi talqylaǵan.
Kórip otyrǵanymyzdaı, eki el syrtqy saıasat vedomstvolary basshylarynyń osy jolǵy kezdesýi aldynda túrli deńgeılerde birqatar saparlar almasý júzege assa, bul úderisterdiń birte-birte Qyrǵyzstan men О́zbekstannyń ekijaqty yntymaqtastyǵyn nyǵaıta túsý úshin negiz qalap otyrǵany baıqalady. Mysal úshin aıtsaq, osy aptada Tashkentte ótken О́zbekstan men Qyrǵyzstannyń Syrtqy ister mınıstrleri Abdýlazız Kamılov pen Erlan Abdyldaevtyń kezdesýleri sheńberinde taraptar saýda-sattyq, ınvestısııalar, shekara jáne sý salalaryndaǵy ekijaqty yntymaqtastyq máselelerin talqylady.
О́zbekstannyń buqaralyq aqparat quraldary atap ótkendeı, kelissózder barysynda taraptar ekijaqty baılanystardy túrli deńgeılerde jáne naqty nátıjelerge jetkizý boıynsha belsendi ete túsýge ózara múddelilik tanytqan.
О́zbekstan men Qyrǵyzstan arasyndaǵy qarym-qatynastyń Qyrǵyzstannyń ońtústigindegi belgili oqıǵalardan keıin aıtarlyqtaı nasharlaǵany málim. Onyń ústine, sol kezden beri eki eldiń shekarasynda oqtyn-oqtyn talas-tartystar paıda boldy. Endi, ekijaqty ózara qarym-qatynastardyń birte-birte jaqsarýyna oraı, ekijaqty shetin máseleler oń sheshiledi deýge de negiz bar sekildi.
Birinshi kezekte, bul shekaradaǵy talas týǵyzyp kele jatqan telimderge qatysty. Buqaralyq aqparat quraldarynyń habarlaýlaryna qaraǵanda, bul baǵytta qazirdiń ózinde naqty qadamdar baıqalyp otyr. Eki el ókilderinen quralǵan jumys toby 14-20 qyrkúıek aralyǵynda ortaq shekaranyń 23 talas týǵyzyp kele jatqan telimderi boıynsha demarkasııalaý máselelerin qarastyrdy.
О́zbekstan men Qyrǵyzstan saıasatkerleriniń joǵary deńgeıdegi sońǵy kezdesýinen kórinip otyrǵanyndaı, eki el basshylarynyń saıası erik-jigerleri qarym-qatynasty jaqsartýǵa yńǵaı tanytatynyn anyq ańǵartty. Máselen, Qyrǵyz Respýblıkasynyń Syrtqy ister mınıstrliginde eki el mınıstrleriniń kezdesýinen keıin ekijaqty qarym-qatynastyń damý sıpaty oń dınamıkaǵa qaraı burylǵany atap ótildi. Mysaly, Erlan Abdyldaev pen Abdýlazız Kamılovtiń kezdesýinen shyǵatyn bir qorytyndy: taraptarǵa máselelerdiń barlyq kesheni boıynsha ári qaraıǵy yntymaqtastyqty júrgizýge múmkindik beretin «jol kartasyn» daıyndaý qajettigi bolyp otyr. Ol saıası, saýda-ekonomıkalyq, shekaralyq, mádenı-gýmanıtarlyq jáne basqa da máselelerdi qamtıdy.
Kezdesýdiń qorytyndylary boıynsha qyrǵyz tarapy ózbek jaǵyna jaqyn arada jaýap saparmen shekara mańyndaǵy yntymaqtastyqty nyǵaıtý aıasynda Osh qalasyna kelip qaıtýǵa resmı shaqyrý tabystaýy ekijaqty qarym-qatynastyń oń sıpat ala bastaǵanynyń qısyndy jalǵasy boldy deýimiz kerek.
Rýslan IZIMOV,
caıasattanýshy