О́skemen qalasynda Konfederasııa Kýbogynyń «V» tobyndaǵy irikteý kezeńi aıaqtaldy. Bul topta Shyǵys Qazaqstan, Soltústik Qazaqstan, Batys Qazaqstan jáne Aqmola oblystary óner kórsetti. Bir kún ishinde oblystardyń quramalary grek-rım, erkin kúres, dzıýdo jáne taekvondo sportynan úzdikterdi anyqtady.
Batys Qazaqstan oblysynyń komandasy taekvondodan osy toptyń jeńimpazy atanyp, fınaldyq kezeńge joldama aldy. Aldymen olar 71:31 esebimen Soltústik Qazaqstannan barǵan sportshylardan basym tússe, artynsha Shyǵys Qazaqstan quramasyn 34:23 nátıjesimen jeńdi.
Boz kilemde qyzyqty beldesýler ótti. Jarysqa qatysyp jatqan komandalardyń quramynda tájirıbeli sportshylar men talantty jastar óner kórsetti. Shyǵys Qazaqstan quramasy bul jarysqa grek-rım kúresinen eki Olımpıadaǵa qatysqan, Azııa oıyndarynyń júldegeri Darhan Baıahmetov pen erkin kúresten Azııa oıyndarynyń júldegeri, Azııa chempıony Rasýl Qalıevti shyǵardy. Toptyq kezeńniń qorytyndysy boıynsha grek-rım kúresinen Soltústik Qazaqstan quramasy jeńiske jetti. Birinshi kezdesýinde olar Shyǵys Qazaqstan komandasyn jeńip, odan keıin BQO jáne Aqmola oblysy quramalaryn tize búktirdi. Erkin kúresten Shyǵys Qazaqstan oblysy jeńimpaz atandy. Olar úsh kezdesýinde de qarsylastaryn 6:0 esebimen tas-talqan etti.
Dzıýdoshylardyń jarysynda tatamı qojaıyndaryna teń keler eshkim bolmady. Quramynda Dastan Yqybaev syndy tájirıbeli sportshysy bar Shyǵys Qazaqstan quramasy barlyq kezdesýlerin senimdi jeńispen aıaqtady.
Esterińizge sala keteıik, 18 qazanda «S» tobynyń irikteý kezeńi Shymkent qalasynda ótip, Ońtústik Qazaqstan quramasy grek-rım jáne erkin kúresten, taekvondodan jeńiske jetip, fınaldyq kezeńge shyqty. Al dzıýdodan Qaraǵandy oblysy jeńimpaz atanǵan bolatyn. Alda eki toptyń irikteý kezeńi bar. 30 qazanda Taraz qalasynda «D» tobynyń jarysy ótse, 6 qarashada «A» toby Qyzylordada jarysady.
Konfederasııa Kýbogy – Tımýr Qulybaevtyń bastamasymen qolǵa alynǵan jańa joba. Jarystyń jalpy júlde qory – 125 mıllıon teńge. Fınaldyq kezeń 3-4 jeltoqsanda Almaty qalasynda ótedi.