Jas órenderdiń kitap kórmesi

«Mazmundama», «Arman-PV», «Steppe & World Publishing», «East Publishing» sekildi otandyq baspalarǵa halyqaralyq jármeńkede kitaptaryn tanystyrý múmkindigi týdy. Otandyq baspalardyń balalarǵa arnalǵan úzdik kitaptary ulttyq stendke qoıylyp, kópshilikke tanystyryldy. Mádenıet jáne aqparat mınıstrliginiń ókili Tolqyn Turǵalıqyzynyń aıtýynsha, buǵan deıin atalǵan kórmege jekelegen baspalar kelse, bul joly uıymdasqan túrde Qazaqstan baspagerler jáne polıgrafıster qaýym­dastyǵynyń qoldaýymen ulttyq stend uıymdastyryldy.

«Mınıstrlik Bolonıa kórmesine kóp kóńil bólip otyr. Eki jyl qatarynan Frankfýrtta ótken halyqaralyq kitap kórmesine Qazaqstannyń ulttyq stendin qoıdyq. Bıyl mine, osy úrdis Bolonıa kórmesinde jalǵasyn tapty. Bizdiń stendti tamashalaýshylar óte kóp. Mundaı kórme otandyq bas­pa salasynyń damýyna  óte qajet. Sebe­bi kórme halyqaralyq baılanys orna­týǵa, birlesken jobalar men quqyq ­alma­sýǵa, ulttyq kitaptarymyzdy, sonyń ishinde balalarǵa arnalǵan týyndylarymyzdy halyqaralyq aýdıtorııaǵa ta­nystyrýǵa, álemdik tájirıbeler men trendterdi tanýǵa, balalar ádebıeti­niń jańa baǵyttaryn baıqaýǵa, ıllıýstrasııa stılderin meńgerýge, eń bastysy, zamanaýı talaptarǵa saı kitap shyǵarýǵa kómektesedi», deıdi Tolqyn Turǵalıqyzy.

Halyqaralyq kórmege elimizdiń atynan 18 delegat, atap aıtqanda, bas­pa ókilderi, ıllıýstratorlar, avtorlar, aýdarmashylar barǵan. Sondaı-aı kórmede alǵash ret otandyq sýretshiler talqylaý sessııasyna qatysýǵa múmkindik aldy. Illıýstrator, grafıkalyq dızaıner jáne vızýaldy sýretshi Aısulý Almasbaı, Dáýren Tasbolatov,  «East Publishing» baspasynyń dırektory Ámına Jemeneı «Murany beıneleý: balalar kitaptaryndaǵy ulttyq bolmysty qaıta taný» taqyrybynda ótetin kásibı kezdesýge qatysty. «Bizge halyqaralyq kórme barysynda Ortalyq Azııa avtorlary men ıllıýstratorlarynyń alǵashqy kásibı kezdesýine qatysý múmkindigi týdy. Balalar kitaptaryndaǵy ulttyq bolmysty taný taqyrybynda oı qozǵaldy. Sondaı-aq qazaq balalar ádebıetin álemge tanytýdyń qadamdary týraly pikir aıtyldy», deıdi ıllıýstrator Aısulý Almasbaı.

Al «Mazmundama» baspasynyń jetekshisi Shyńǵys Muqan halyqaralyq kórmede Qazaqstan buryshynyń ashyl­ýyn qazaq balalar ádebıetine kórsetilgen qoldaý dep biledi. «Bul iske túrtki bolǵan «Nomad Cultural Foundation» qorynyń jetekshisi – Baıan Qabylash. Tek Qazaqstan ǵana emes, О́zbekstan men Qyrǵyzstannyń buryshyn qatar uıymdastyryp, Ortalyq Azııa bolyp qatysyp jatyrmyz. Kórmege 100-den asa eldiń baspasy keldi. Birneshe pavılon qaz-qatar tur, birin aralap shyǵýǵa jarty kúniń jetpeı qalady. Munda nebir tamasha kitaptar bar», deıdi Shyńǵys Muqan. Baspager sonymen qatar balalar kitaptarynyń marapattaý rásimine qatysyp, úlken áser alǵanyn da atap ótti.

Kórme barysynda balalar ádebıeti sala­syndaǵy álemdegi eń joǵary halyq­aralyq marapat – Andersen syı­lyǵy laýreattarynyń esim-soıy jarııalan­dy. Bıyl bul mártebeli syılyqty bala­lar qalamgeri Michael Rosen (Uly­brı­tanııa) ıelendi. Al ıllıýstrasııa boıynsha Cai Gao (Qytaı) enshiledi. Olar 44 elden usynylǵan 78 úmitkerdiń ishinen halyqaralyq 10 sarapshydan turatyn qazylar alqasy arqyly tań­dal­dy. Andersen syılyǵy balalar qalam­gerlerine 1956 jyldan beri (1966 jyl­dan ıllıýstratorǵa) eki jylda bir ret be­rilip keledi. Bıyl mártebeli syı­­lyqtyń berile bastaǵanyna 70 jyl toldy.