Qazaqstandaǵy avtomektepterde júrgizýshi kýáligin alý kezinde zańsyz qosymsha tólemder alynýy múmkin. Májilis otyrysynda osylaı degen depýtat Maqsat Tolyqbaı Ishki ister mınıstrligin tekseris júrgizýge shaqyrdy, dep habarlaıdy Egemen.kz.
«Qazir ár azamat avtomektepte shamamen eki jarym aı oqý kýrsynan ótýi tıis. Bul durys. Biraq sonymen qatar avtomektep ishinde QR-kod arqyly 8,5 myń teńge tóleý talap etiledi. Bul aqsha avtomektepke de, resmı júıege de baılanysty emes», dedi depýtat.
Zań jobasy maquldandy: Endi avtomektepterge qandaı talap qoıylady?
Onyń aıtýynsha, jyl saıyn shamamen 670 myń adam júrgizýshi kýáligin alýǵa ótinish beredi. Eger árqaısysy atalǵan somany tólese, jyldyq aınalym 5-6 mlrd teńgege deıin jetýi múmkin.
«Bul qarajat bıýdjetke de, IIM júıesine de túspeıdi. Ashyq esep joq. Keıbir derekterge sáıkes, aqsha shetelde turatyn jeke tulǵalardyń paıdasyna ketýi múmkin. Bul kóleńkeli qarjy aınalymy emes pe?», dep suraq qoıdy Maqsat Tolyqbaı.
Depýtat bul shemanyń artynda uıymdasqan qurylym bolýy múmkin ekenin de joqqa shyǵarmaı, ýákiletti organdardy shara qabyldaýǵa shaqyrdy.
Ishki ister mınıstrliginiń ókili Sanjar Ádilov bul máselege qatysty tekseris bastalǵanyn aıtty.
«Bul másele jumys toptarynda da kóterildi. Qazirgi ýaqytta Ákimshilik polısııa komıteti qyzmettik tekseris júrgizip jatyr. Biz mundaı deldaldar men zańsyz tólemderge jol berilmeýi tıis dep sanaımyz. Tıisti sharalar qabyldanady», dedi ol.
Avtomektepterde olqylyqtar anyqtaldy: 700-den astam oqý toby jabyldy
IIM málimetinshe, elde 727 avtomektep tirkelgen, onyń 160-y memlekettik, 567-si jeke menshik. Degenmen olardyń qyzmetine baqylaý álsiregeni aıtyldy.
Nurbolat AMANBEK