Májilis depýtaty Murat Ábenov Ishki ister mınıstrligine shetel azamattarynyń Qazaqstanǵa qarý-jaraq alyp kelýi, saqtaýy qanshalyqty zańdy ekeni týraly suraq qoıdy, dep habarlaıdy Egemen.kz.
Depýtat shetel azamattarynyń Qazaqstan aýmaǵyna zańsyz qarý ákelý quqyǵyna qatysty másele kóterdi.
«Shetel azamattarynyń Qazaqstanǵa kez kelgen qarýdy, onyń ishinde antıkvarlyq nemese mýzeılik qarýdy alyp kelýine ruqsat bar ma? Azamattar ol qarýdy kóshede alyp júre ala ma? Qarýdy bóten adamnyń páterinde saqtaý qanshalyqty zańdy? Jýyrda Nazarbaev ýnıversıteti aýmaǵynan qarý tabylǵany belgili boldy. Osyǵan baılanysty ne aıtasyz? Páter ıesi emes adamnyń, qarý saqtaýǵa arnalmaǵan jerde qarýdy saqtaýyna nemese ustaýyna zań boıynsha ruqsat etile me?», dedi Murat Ábenov.
Depýtat saýalyna jaýap bergen Ishki ister mınıstrliginiń ókili Nazarbaev ýnıversıtetinde tabylǵan qarýǵa qatysty tekserý júrgizilip jatqanyn aıtty. Sondaı-aq ol antıkvarlyq qarýdy tıisti lısenzııa bolǵan jaǵdaıda jáne arnaıy qorapta tasymaldaýǵa ruqsat etiletinin jetkizdi.