Búgin - «Baıqońyr» ǵarysh kesheninde ǵaryshqa tuńǵysh sapar shegý jolynda mert bolǵandardy eske alý kúni.
24 qazan kúni ǵarysh aılaǵynyń ushý alańyndaǵy barlyq jumys toqtaıdy, eshqandaı ushý belgilenbeıdi jáne bul dástúr 53 jyldan beri óz qalybyn buzǵan joq.
Keńes kosmonavtıkasynyń tarıhynda 1960 jyldyń 24 qazany men 1963 jyldyń 24 qazany qaraly kún bolyp sanalady. Baıqońyr aılaǵynda zymyran-ǵaryshtyq tehnıkany synaý kezinde birshama adam mert boldy.
Baıqońyr aılaǵyndaǵy eń úlken apat 1960 jyly 24 qazanda R-16 qurlyqaralyq ballıstıkalyq zymyranyn synaý maqsatynda ushyrýǵa daıyndyq kezinde boldy.
Josparlanǵan ushýǵa 30 mınýt qalǵanda №41 ushyrý alańynda ekinshi satyly qozǵaltqysh jospardan tys iske qosylyp ketken. Shyqqan gaz birinshi satyly bakty órtep, sharpyǵan órt 100 metr aýmaqty qamtydy. Resmı málimetter boıynsha, apat saldarynan 74 adam qaza taýyp, 50 adam jaraqattanǵan. Keıinirek, alynǵan jaraqat pen kúıikten taǵy tórt adam (ózge málimetter boıynsha 92-den 126 adamǵa deıin) kóz jumǵan. Qaza tapqandar arasynda KSRO strategııalyq maqsattaǵy zymyran jasaǵynyń bas qolbasshysy, artıllerııanyń bas marshaly Mıtrofan Nedelın de bar edi.
Tarıhı anyqtamalarda apat sebebi retinde qaýipsizdik tehnıkasy erejelerin óreskel buzý, tolyq daıyn bolmasa da, zymyrandy Qazan tóńkerisi mereıtoıy qarsańynda ushyrýdy josparlaǵanyn atap kórsetken. Apat týraly málimetter memlekettik qupııa bolyp sanaldy jáne ol týraly aqparattar alǵash ret 1989 jyly ǵana keńestik BAQ betterinde jaryq kórdi.