QR Parlamenti Májilisiniń tóraǵasy Nurlan Nyǵmatýlın Jenevada ótip jatqan Parlamentaralyq odaqtyń 135-shi Assambleıasyna qatysty.
«Bıyl Qazaqstan Táýelsizdiginiń 25 jyldyǵy toılanady. Qysqa merzimde elimiz Tuńǵysh Prezıdent Nursultan Nazarbaevtyń basshylyǵymen júrgizilgen saıası, áleýmettik-ekonomıkalyq reformalardyń arqasynda orasan tabystarǵa qol jetkizdi. Sonymen qatar, jalpyǵa birdeı saılaý quqyǵy kepildigi, genderlik teńdik jáne adam quqyǵyn qorǵaý salalarynda aıtarlyqtaı jumystar atqaryldy», - dedi Májilis spıkeri.
N.Nyǵmatýlın atap ótkendeı, Qazaqstanda adam quqyǵyn qorǵaý baǵytynda qarqyndy damý jolyna túsken ulttyq júıe qalyptasqan. Onyń mańyzdy elementteriniń biri – QR Prezıdenti janyndaǵy adam quqyǵy jónindegi komıssııa.
Májilis tóraǵasynyń aıtýynsha, sońǵy jyldary elimizde ulttyq zańnamany jetildirý jolynda birqatar mańyzdy reforma qolǵa alyndy. Ol elimizdiń demokratııa úrdisteri men adam quqyn qamtamasyz etýge degen ustanymyn kórsetedi.
Aıta ketsek, Parlamentaralyq odaq 1889 jyly qurylǵan. Ol parlamentterdiń is-áreketin úılestirý qyzmetine arnalǵan halyqaralyq uıym. Parlamentaralyq odaq BUU-da baıqaýshy mártebesine ıe.
Qazaqstan uıymǵa 1993 jyly 4 naýryzda múshe boldy. Qazaqstan Parlamentinde PAO ulttyq toby retinde Májilis tóraǵasy basqaratyn QR Parlamentiniń delegasııasy qurylǵan.