QR Memlekettik qyzmet isteri jáne sybaılas jemqorlyqqa qarsy kúres agenttiginiń búgingi keńeıtilgen májilisine qatysqan Prezıdent Ákimshiliginiń basshysy Ádilbek Jaqsybekov uzaq ýaqyt boıy bos oryndardy ustap, jumysqa adam almaı jatqan mınıstrlikterdi synǵa aldy. Onyń oıynsha, atalǵan memlekettik organdar rezervte bar adamdardy qyzmetke qoıýǵa asyqpasa, vedomstvo shtatyn qysqartýǵa bolady.
"Maǵan túsken aqparatqa sáıkes, "A" korpýsyndaǵy vakanttyq qyzmetterge adam taǵaıyndaý jumysy durys júrgizilmeıdi. Qazirgi kezde rezervtiń baryna qaramastan, 16 laýazym áli de bos tur. Tórt aı boıy alty birdeı mınıstrlikte 8 komıtettiń tóraǵasy áli taǵaıyndalmaı otyr. Al osy qyzmetke úmitkerlerdiń rezervi 39 adamdy qurap otyr", - dedi Á.Jaqsybekov.
Onyń aıtýynsha, memlekettik qyzmet salasynda mamandardyń jıi aýysýy - basty problemalardyń biri. Soǵan qaramastan, qarjy mınıstrliginde 970 qyzmet orny bos tursa, ulttyq ekonomıka mınıstrliginde - 900-den astam, al aýyl sharýashylyǵy mınıstrliginde 280 qyzmetke áli adam alynbaǵan. Oblystyq jáne aýdandyq ákimdikterde de solaı.
"Negizi, bos turǵan jumys oryndarynyń kóptigi, basshylardyń jıi aýysýy memlekettik qyzmet apparatynyń jumysyna keri áserin tıgizedi. Bizge osyny jan-jaqty zerdelep shyǵý qajet. Qazirgi jaǵdaıǵa ne sebep boldy? Nege ol oryndar bos tur? Bálkim, sol mınıstrlikterdiń shtatyn qysqartamyz. Sonyń arqasynda biraz aqshany únemdeýge bolady", - dep atap kórsetti Prezıdent Ákimshiliginiń basshysy.