Qazir ǵana "Almaty-Arenada" boks keshiniń basty kezdesýi aıaqtaldy. Birinshi orta salmaqta WBA Fedelatin jáne WBO intersontinental tujyrymy boıynsha chempıondyq tıtýl úshin ganalyq Patrık Alloteımen jekpe-jekke shyqqan qazaq boksshysy Qanat Islam upaı sanymen jeńiske jetti. Bul 32 jastaǵy Qanattyń 22-shi jeńisi.
Birinshi raýnd qarsylastar bir-birin barlaýmen ótkizdi.
Ekinshi raýndta jerlesimiz shabýylǵa kóship, birneshe soqqysyn dál tıgizdi. Alloteı kóbine qorǵanýmen júrdi.
Úshinshi raýndta Qanat Islam qarsylasyn birneshe ret buryshqa qamap, sol qolymen bastan jáne baýyr tustan aıtarlyqtaı salmaqty soqqylar berdi. Alloteıdiń qarsy shabýylynan jaqsy qorǵanǵanymen, bir jaqyn urysta Qanat bir-eki márte soqqy ótkizip aldy. Alaıda, osy raýndta Qanat erkin, senimdi qımylǵa kóshti.
Tórtinshi raýnd jalpylaı Qanattyń basymdyǵymen ótti. Allotoeı taǵy da oń jaqtan birneshe soqqy jedi. Qanattyń qarsylastan kásibı deńgeıi aıtarlyqtaı joǵary ekeni baıqaldy.
Besinshi raýnd shamamen teń ótti. Báribir dál tıgen soqqylar jóninen Qanat alda turdy deýge bolady. Biraq osy raýndtyń sońyna qaraı keı sátterde ol sál sharshaǵandaı kórindi.
Altynshy raýndta Alloteı aıaqpen jaqsy qımyldap, qashyqtyqty saqtaı bildi. Eki-úsh soqqysy Qanatqa dál tıdi.
Jetinshi raýndtaǵy basymdyqty Patrıkke berýge bolady. Ol Qanattyń soqqylarynan jaqsy qashyp, ózi birneshe ret alystan jyldam soqqy jasaı bildi.
Segizinshi raýndtyń basynda Alloteı sergek qımyldap, eki-úsh djebin dál ótkizdi. Raýndtyń ortasyna taman Qanat qashyqtyqty qysqartyp birneshe dál soqqy jasady. Patrık klınchke kóshti.
Toǵyzynshyda basymdyq Qanatta boldy. Raýnd ortasynda Alloteıdiń 2-3 hýgy ótti. Alaıda raýnd sońyna qaraı Qanat qarsylasyn buryshqa taqap nátıjeli shabýyl jasady. Patrıkke soqqylardyń aýyr tıgeni osy sátterde anyq bilindi.
Onynshy jáne on birinshi raýndtar qoıan-qoltyq uryspen teń dárejede ótti. Qashyqtyq ustaǵan Alloteı birshama tyń kórindi.
Sońǵy raýnd óte tartysty ótti. Qanat Islam alǵa umtyldy. Alloteı qasha qımyldady, sál sergek kórindi. Biraq dál soqqylar jóninen jerlesimiz azdap basym boldy.
Tóreshiler upaı sanymen jeńisti bir aýyzdan Qanat Islamǵa berdi.
Jekpe-jekten keıin sóılegen Qanat Islam on eki raýndtyq aıqastyń ózi úshin ońaı bolmaǵanyn, Alloteıdiń jaqsy bokstasqanyn, óziniń bul jeńispen toqtamaıtynyn aıtty.