Nıý-Iorkte Qazaqstan Respýblıkasy Táýelsizdiginiń 25 jyldyǵyna arnalǵan velosherý ótti. Oǵan AQSh-taǵy otandastarymyz, stýdentter men dıplomattar qatysty, dep habarlaıdy egemen.kz «Habar 24» arnasyna silteme jasap.
Qazaqstandyq komandany ataqty veloshabandoz, Olımpıada chempıony Aleksandr Vınokýrov bastap bardy. Velosherýge elimizdiń Nıý-Iorktegi Bas konsýldyǵy uıytqy bolyp, Qazaqstan-Amerıka alıansy qoldaý kórsetti.
«Týymyzdy jelbiretip, Nıý-Iork tórinde velosıped tebemiz dep 25 jyl buryn kim oılaǵan?! Osyndaǵy Ortalyq saıabaqta júrgenniń ózi bir ǵanıbet! Erte turyp, saıabaq ishinde júgirip, aınalany kórip alǵam. Adamdar qaptap júr. Sportty buqaralyq sıpatta damytý degenimiz osy. Bizdiń elimizde de salaýatty ómir saltyn keńinen nasıhattaýǵa kóp kóńil bólinip jatyr. Igi istiń jarqyn úlgisi - álemdi sharlap júrgen bizdiń «Astana Pro Team» komandamyz», - deıdi Olımpıada chempıony Aleksandr Vınokýrov.
Velosherýge qatysqandar Prezıdent Nursultan Nazarbaevtyń antııadrolyq bastamalary jáne EXPO men «Astana» halyqaralyq qarjy ortalyǵynyń belgileri beınelengen jeıdeler kıip, kópshilik kózaıymyna aınaldy.